Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 66 Hüküm no: 28 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Batişta v. Tomazo’nun evini Üsküdar’daki Mahmud Efendi vakfı mütevellisi Osman Dede’ye istiğlâl yoluyla devri Mahmiye-i Galata hâricinde Kalafatçıbaşı mahallesinde sâkin Fransız tercümânlarından olan Batişta v. Tomazo nâm zimmî meclis-i şer‘-i hatîr-i lâzımü’t-tevkīrde medîne-i Üsküdar’da merhûm eş-Şeyh Mahmud Efendi -kuddise sırruhü’l-azîzin- evkāfına bi’l-fi‘l kāimmakām mütevellî olan işbu râfi‘ü’l-kitâb el-Hâc Osman Dede b. Davud nâm kimesne mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Gaspar v. Anton nâm zimmî mülkü ve bir tarafdan Kostantin Karaca nâm zimmî mülkü ve iki tarafdan tarîk-i âm ile mahdûd dâhiliyye ve hâriciyyede büyût-ı adîdeyi ve bi’r-i mâ ve iki kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzilimi mâl-ı vakf-ı mezbûrdan bin yüz altmış altı buçuk aynî esedî guruşu mütevellî-i mezbûr el-Hâc Osman Dede ile bi tarîki’l-istiğlâl bey‘ ve teslîm ol dahi vech-i muharrer üzre iştirâ ve tesellüm edip semeni olan meblağ-ı mezbûr bin yüz altmış altı buçuk guruşu yedinden bi’t-tamâm ve’l-kemâl ahz ü kabz eylediğimden sonra mütevellî-i mezbûr el-Hâc Osman Dede menzil-i mahdûd-ı mezbûru ba‘de’t-tahliyyeti’ş-şer‘î ve’t-tekābuzi’l-mer‘î târih-i kitâbdan bir sene tamâmına değin yüz on altı esedî guruş ve üç rub‘ guruş ücret ile bana îcâr edip ben dahi minvâl-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Recebi’l-ferd li sene selâse ve seb‘în ve elf Şuhûdü’l-hâl: Es-Sâbıkūn.