Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 67 Hüküm no: 29 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçük yaşta annesi Râbia Hâtun tarafından Bayram b. Mustafa’ya nikahlanan İsmihan’ın baliğ olduğunda nikah akdini bozması Mahmiye-i Galata’ya tâbi‘ kasaba-i Kasımpaşa mahallâtından Bedreddin Bey mahallesinde sâkine İsmihan bt. Sarı Ali nâm bikr-i bâliğa meclis-i şer‘de işbu râfi‘ü’l-kitâb Bayram b. Mustafa nâm kimesne mahzarında ikrâr ve takrîr-i kelâm edip vâlidem olup işbu hâzıra bi’l-meclis olan Râbia bt. Perviz nâm hâtun bin beş yüz akçe mehr-i müeccel üzerine beni sagīre olduğum hâlde mezbûr Bayram’a tezvîc ve akd-i nikâh eylemişidi hâlâ ben medhûlün bihâ olmayıp bâliğa olduğum hînde nefsim ihtiyâr edip huzûr-ı hâkimü’ş-şer‘de tefrîk taleb eylediğimde ba‘de’t-tahlîfi’ş-şer‘î hükm-i hâkimü’ş-şer‘le beynimizde kāim olan akd-i mezbûr fesh olmağın ben dahi mehrim olan meblağ-ı mezbûr bin beş yüz akçe da‘vâsından fâriğa olup mezbûr Bayram’ın zimmetini ibrâ-i âm ile ibrâ ve iskāt eyledim min ba‘d husûs-ı mezbûre müte‘allika merkūm ile vechen mine’l-vücûh da‘vâ ve nizâ‘ım yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Recebi’l-ferd li sene selâse ve seb‘în ve elf Şuhûdü’l-hâl: Abdullah Çavuş b. Abdullah el-Mübâşir, Mustafa Çelebi b. Mehmed er-Râcil, Mehmed b. Şaban, Mehmed Çelebi b. Abdullah, Mustafa b. Ahmed, Mehmed b. Hızır, Musa b. Receb, Zülfikār b. İbrahim, el-Hâc Cafer b. Yakub