Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 67 Hüküm no: 30 Orijinal metin no: [4a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed’in tasarrufundaki oda ile ilgili olarak hak talep eden İsmihan ve Ümmühâni hâtunların haksız olduklarının anlaşıldığı Mahmiye-i Galata mahallâtından Kâtib Mustafa mahallesinde sâkine İsmihan bt. Şaban nâm hâtun meclis-i şer‘-i hatîr-i lâzımü’t-tevkīrde bâ‘isü hâze’l-kitâb Ali Beşe b. Mehmed nâm kimesne mahzarında üzerine da‘vâ ve takrîr-i kelâm edip mahmiye-i mezbûrede Çukur Câmi‘ mahallesinde merhûm Topçubaşı vakfı’ndan olup mahalle-i mezbûrede vâki‘ bir tarafdan terzi Şaban mülkü ve bir tarafdan Ali Reis mülkü ve iki tarafdan tarîk-i âm ile mahdûd odanın nısfı babam müteveffâ Şaban’dan bana intikāl etmişiken mezbûr Ali Beşe fuzûlî zabt eder suâl olunup yed-i âriyesi kasr ve izâle olunmak matlûbumdur dedikde gıbbe’s-suâl mezbûr Ali Beşe cevâbında zikr olunan oda-i mezbûre İsmihan ile hâzıra bi’l-meclis karındaşı Ümmühâni Hâtun’a babalarından intikāl edip lâkin târih-i kitâbdan on bir sene mukaddem her biri âkile ve bâliğa oldukları hâlde bana izn-i mütevellî ile yirmi sekiz buçuk kıt‘a esedî guruş bedel mukābelesinde ferâğ [ve] tefvîz ben dahi vech-i muharrer üzre tefevvuz ve kabûl eyledim deyû mütevellî temessükü ibrâz edicek gıbbe’l-istintâk ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahalle-i mezbûre sükkânından el-Hâc Süleyman b. Receb ve Osman b. Abdullah nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûretân Ümmühâni ve İsmihan târih-i mezbûrda her biri âkile ve bâliğa oldukları hâlde menzil-i mezbûru müdde‘î-i mezbûre yirmi sekiz buçuk kıt‘a esedî guruş bedel mukābelesinde izn-i mütevellî ile bizim huzûrumuzda ferâğ ve tefvîz edip ol dahi vech-i muharrer üzre tefevvuz ve kabûl eyledikden sonra bedel-i tefvîz olan meblağ-ı mezbûru müdde‘î-i mezbûrun yedinden tamâmen ahz ü kabz eylediler biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyete şerâiti’l-kabûl şehâdetleri makbûle olup mûcebince mezbûretân Ümmühâni ve İsmihan mu‘ârazadan men‘ birle mâ vaka‘a. Fî 2 Receb sene 1073 Şuhûdü’l-hâl: Es-Seyyid Mehmed b. Bedreddin, es-Seyyid Mehmed Efendi el-İmâm, Ahmed b. Mustafa, Ahmed b. Hüseyin, Mahmud b. İbrahim, el-Hâc Mustafa (...), Receb Yazıcı b. Mehmed