Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 696 Hüküm no: 898 Orijinal metin no: [107a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun’un ölen kardeşi İbrahim’in terekesini Ali Efendi b. el-Hâc Hüdâverdi’den alınması için Veli Bey b. Halil’i vekil tayin edildiği Fi’l-asl mahmiye-i İstanbul’da Ahırkapı kurbunda sâkine olup hâlâ mahrûse-i Edirne’de Sultan Selim mahallesi sâkinelerinden olan Fâtıma Hâtun bt. Terzi Rıdvan Ağa tarafından vech-i âtî üzre vekâlet iddi‘â eden Veli Bey b. Halil nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda umdetü erbâbi’t-tahrîr ve’l-kalem Ali Efendi b. el-Hâc Hüdâver[di] mahzarında üzerine da‘vâ ve takrîr-i kelâm [edip] müvekkile-i mezbûrenin li eb karındaşı olup bundan akdem mahmiye-i mezbûrede İshak Paşa mahallesinde vefât eden İbrahim b. ( ) nâm sagīrin terekesinden müvekkile-i mezbûrenin hissesine isâbet edip sagīr-i mezbûrun vasîsinin müvekkile-i mezbûreye teslîm etmek için mûmâ-ileyh Ali Efendi’[ye] teslîm ettiği guruşu müvekkile-i mezbûrenin zevci olup âharı dahi tevkîle vekîli olan umdetü’l-eşbâh Mehmed Efendi mûmâ-ileyh Ali Efendi’den ahz u kabza beni vekîl etmekle suâl olunup meblağ-ı mezbûru bana teslîme mûmâ-ileyh Ali Efendi’ye tenbîh olunmak matlûbumdur dedikde, gıbbe’s-suâl mûmâ-ileyh Ali sagīr-i mezbûrun terekesinden müvekkile-i mezbûrenin hissesi olan meblağ-ı mezbûru müvekkile-i mezbûreye teslîm için vasîsi kendiye teslîm ettiğini ikrâr, lâkin müdde‘î-i mezbûrun vech-i mübeyyen üzre vekâletini inkâr edicek müdde‘î-i mezbûrdan vech-i mübeyyen üzre vekâletine beyyine taleb olundukda mahrûse-i mezbûrda Derviş mahallesinde sâkin Ali Bey b. İbrahim ve zikr olunan Sultan Selim mahallesi sükkânından Mehmed Bey b. İlyas nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Fâtıma bizim huzûrumuzda meblağ-ı mezbûru mûmâ-ileyh Ali Efendi’den ahz u kabz ve kendiye îsâle bir kimesneyi tevkîle zevci mûmâ-ileyh Mehmed Efendi’yi vekîl ettikden sonra mûmâ-ileyh Mehmed Efendi dahi meblağ-ı mezbûr dört yüz otuz iki guruşu mûmâ-[ileyh] Ali Efendi yedinden ahz u kabza ve müvekkile-i mezbûreye îsâle müdde‘î-i mezbûru tarafından vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet edip ve ba‘de’l-kabûl mûcebince vekâletine hükm olunup meblağ-ı mezbûru müdde‘î-i mezbûra teslîme mûmâ-ileyh Ali Efendi’ye [107b] tenbîh olundukdan sonra vekîl-i mezbûr Veli Bey meclis-i mezbûrda mûmâ-ileyh Ali Efendi mahzarında ikrâr ve takrîr-i kelâm edip ânifen bana teslîme tenbîh olunan meblağ-ı mezbûr dört yüz otuz iki guruşu müvekkile-i mezbûreye îsâl için mûmâ-ileyh Ali Efendi yedinden tamâmen ahz u kabz eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâmin aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi [b.] Abdullah, Hasan Beşe b. ( ) Çukadâr, İbrahim Çelebi b. Mehmed, Veli Beşe b. ( ).