Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 69 Hüküm no: 32 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Baliğa olmadan Bayram b. Mustafa ile evlendirilen İsmihan bt. Ali’nin akdi feshettiği Mahmiye-i Galata’ya tâbi‘ kasaba-i Kasımpaşa’da Bedreddin Bey mahallesinde sâkine işbu râfi‘atü’l-vesîka İsmihan bt. Ali nâm bikr meclis-i şer‘-i hatîr-i lâzımü’t-tevkīrde zevci Bayram b. Mustafa nâm kimesne muvâcehesinde takrîr-i kelâm [edip] bundan akdem vâlidem işbu hâzıra bi’l-meclis Râbia nâm hâtun bin beş yüz akçe mehr-i müeccel üzerine beni sagīre olduğum hâlde mezbûr Bayram’a tezvîc ve akd-i nikâh eylemişidi hâlâ ben bâliğa oldum benim için şer‘an hıyâr-ı bülûğ olmağla hîn-i bülûğumda nefsimi ihtiyâr ve akd-i mezbûru fesh eyledim hâlâ beynimizde kāim olan akd-i mezbûr fesh olunup beynimizde tefrîk olunmasına hükm taleb ederim dedikde hâkim-i muvakki‘-i kitâb tûbâ leh ve hüsnü-me’âb dahi mezbûre İsmihan hîn-i bülûğunda akd-i mezbûru tecvîz etmeyip nefsini ihtiyâr ve fesh-i akd eylediğine yemîn teklîf edildikde ol dahi alâ vefki’l-mes’ûl yemîn billâhi’l-aliyyi’l-a‘lâ eyledikden sonra beynlerinde kāim olan akdin feshine hükm birle mâ vaka‘a bi’t-taleb ketb olundu Fi’l-yevmi’r-râbi‘ ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Abdi Çavuş b. Abdullah el-Mübâşir, Mustafa Çelebi b. Mehmed er-Râcil, Mehmed b. Şaban, Mehmed Çelebi b. Abdullah, Mustafa b. Ahmed, Mehmed b. Hızır, Zülfikār b. İbrahim, Musa b. Receb, el-Hâc Hızır b. Yakub.