Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 69 Hüküm no: 33 Orijinal metin no: [4b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Galata’da oturan Duka’nın Sultan Ahmed vakfına reaya kaydedildiğinin anlaşıldığı ve kendisinden Sidrekapsi ile ilgisinin bulunmadığının tespiti Kasaba-i Sidrekapsi’de sâkin kefere re‘âyâsı taraflarından "i‘mel bi re’yike fî külli şey’in" masdûkunca vekîlleri olan Yani nâm [zimmî] mahfil-i kazâda bâ‘isü’l-kitâb Duka mahzarında bi’l-vekâle üzerine da‘vâ ve takrîr-i kelâm edip mezbûr Duka zimmî kasaba-i mezbûre re‘âyâsından olup târih-i kitâbdan on sene mukaddem celâ-yı vatan edip mahmiye-i Galata’da sâkin olmağla sinîn-i mezkûrda mezbûr zimmînin üzerine edâsı lâzım gelen cizye ve sâir rüsûm-ı ra‘iyyeti taleb ederim suâl olunsun dedikde inde’s-suâl mezbûr Duka cevâbında ben kasaba-i mezbûre re‘âyâsından olmadığımdan mâ‘adâ mahmiye-i Galata merhûm ve mağfûrun leh Sultan Ahmed Hân evkāfından olup bir seneden ziyâde sâkin olan re‘âyâ tâifesini vakf-ı mezbûr zâbitleri vakfa re‘âyâ kayd edip rüsûm-ı ra‘iyyetlerin vakıf için zabt etmek üzre yedlerinde müte‘addid evâmir-i şerîf-i cihân-mutâ‘ olmağla on seneden mütecâvizdir ki medîne-i Galata zâbitleri ber mûceb-i fermân-ı âlî beni vakf-ı mezbûre re‘âyâ kayd edip cizye ve sâir rüsûm-ı ra‘iyyeti ahz edip kasaba-i mezbûr Sidrekapsi’de alâka ve medhalim olmayıp bu bâbda yedimde şeyhülislâm hazretlerinden fetvâ-yı şerîfem dahi vardır deyû hâlâ şeyhülislâm müfti’l-enâm olup burhânü’l-füzelâi’n-necâyir ve’l-ahâlî, ummânü bihârü’l-ulûm ve’l-me‘âlî, keşşâfü müşkilâti’d-dîniyye, hallâlü mu‘dilât-ı yakīniyye nûru hadakati’l-ilm ve’l-fetvâ nûru hadîkati’l-vera‘ ve’t-takvâ câmi‘ü fezâili’l-evâil ve’l-evâhir ıkdü’l-mesâ’ili mahlûle bi esbâbı aklâmihi’l-münîfe ve mâ berihat suverü’l-fetvâ karînetün bi ecvibeti’ş-şerî‘ati’l-müteşerrihîn fezâiluhû fi’l-âfâk hazret-i Yahya Efendi ünvânıyla mu‘anven fetvâ-yı şerîfe ibrâz edip muvâcehelerinde feth ve kırâat olundukda da‘vâlarına muvâfık bulunmağın vekîl-i mezbûr Yani’yi vech-i mu‘ârazadan men‘ birle mâ vaka‘a bi’t-taleb ketb olundu Fi’l-yevmi’s-sâbi‘ ve’l-ışrîn min şehri Recebi’l-ferd li sene selâse ve seb‘în ve elf Şuhûdü’l-hâl: Mehmed Çavuş b. Ahmed el-Mübâşir, Mustafa b. Hüseyin, Emrullah b. Mehmed, Osman b. Mehmed, Siyavuş b. Abdullah, Musa b. Receb, el-Hâc Cafer b. Yakub