Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 71 Hüküm no: 36 Orijinal metin no: [4b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Mehmed’in cariyesi Şâkire’yi azat etmesi Mahmiye-i Galata dâhilinde Câmi‘-i Kebîr mahallesinde sâkin el-Hâc Ali b. Mehmed tarafından i‘tâk-ı âti’z-zikri ikrâra vekîl olup Zülfikār b. İbrahim ve Mehmed Beşe b. Mustafa nâm kimesneler şehâdetleri ile şer‘an vekâleti sâbite [5a] olan İbrahim Çelebi b. Ali meclis-i şer‘-i hatîr-i lâzımü’t-tevkīrde müvekkil-i müşârün-ileyh rıkkını mu‘terife olan işbu orta boylu açık kaşlı gök elâ gözlü Rusiyyetü’l-asl râfi‘atü hâze’l-vesîka Şâkire bt. Abdullah mahzarında bi’l-vekâle ikrâr ve takrîr-i kelâm edip müvekkilim merkūm el-Hâc Ali câriye-i memlûkesi olan mevsûfe-i merkūmeyi hasbeten lillâhi te‘âlâ ve taleben li merzâti rabbihi’l-a‘lâ malından tahrîr ve i‘tâk ve zümre-i harâir-i asliyyâta idrâc ve ilhâk etmekle ba‘de’l-yevm mevsûfe-i mezbûre sâir harâir-i asliyyât gibi hürre olup üzerinde müvekkilim merkūmun velâdan gayrı hakkı kalmadı dedikde mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Mustafa Çelebi b. Receb, Musa b. Receb, el-Hâc Cafer b. Yakub, Cafer b. Hasan, Âbid b. Mustafa, Emrullah b. Mehmed, Muharrem b. Receb, Ahmed Yazıcı b. Mehmed