Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 71 Hüküm no: 37 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffa el-Hâc Ömer’in eşlerinden olup miras taksimine itiraz eden Kezban’ın muhallefatın mikdarı hakkındaki iddiasına delil getirmesi için mühlet verildiği Vilâyet-i Anadolu’da İnebolu kazâsına tâbi‘ Söğücek nâm karye sükkânından iken bundan akdem vefât eden el-Hâc Ömer b. Ahmed nâm kimesnenin verâseti zevcetân-ı metrûketânı Kezban bt. Mehmed ve Müslime bt. Abdullah nâm hâtunlar ile sulbî sagīr oğlu Abdullah ve sulbiye sagīre kızları Mürdüm ve Âişe’ye münhasır olduğu şer‘an zâhir ve müte‘ayyin oldukdan sonra mezbûre Kezban meclis-i şer‘-i hatîr-i lâzımü’t-tevkīrde sıgār-ı mezbûrûnun li ebeveyn ammileri kıbel-i şer‘-i enverden mansûb vasîleri olan râfi‘u hâze’l-kitâb Mehmed b. Ahmed nâm kimesne mahzarında üzerine da‘vâ ve takrîr-i kelâm edip müteveffâ-yı mezbûrun mecmû‘-ı muhallefâtı otuz bin akçe edip meblağ-ı mezbûrun yirmi bin akçesinden nısf sümün hissesine isâbet eden bin iki yüz elli akçeyi bundan akdem muhallefât-ı merkūmeye vâzı‘ü’l-yed olan vasiyy-i merkūm yedinden ahz ü kabz eylemişdim hâlâ muhallefât-ı merkūmeden bâkī on bin akçeden dahi kezâlik nısf sümün hisseme isâbet eyleyen altı yüz yirmi beş akçeyi mezbûrdan taleb ederim suâl olunup alıverilmesi matlûbumdur dedikde gıbbe’s-suâl vasiyy-i merkūm cevâbında müteveffâ-yı mezbûrun cümle-i muhallefâtı ancak yirmi bin akçeye bâliğ olmuşdur deyû muhallefât-ı merkūmun otuz bin akçe olduğunu münkir olucak müdde‘î-i mezbûreden müdde‘âsını mübeyyine beyyine taleb olundukda ityân-ı beyyine için mehl-i şer‘î ile mehil olunup mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Mustafa Çelebi b. Receb, Musa b. Receb, Emrullah b. Mehmed, Muharrem b. Receb, Mustafa b. el-Hâc İsa, Mustafa b. Mehmed.