Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 72 Hüküm no: 38 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Resul Reis ile eşi Meryem Hâtun’un muhâlaa yoluyla boşanmaları Mahrûsa-i Galata’ya tâbi‘ kasaba-i Tophâne mahallâtından Perviz Ağa mahallesinde sâkin Resul Reis b. Durdu nâm kimesne meclis-i şer‘-i hatîr-i lâzımü’t-tevkīrde kasaba-i merkūmede Cihangir mahallesinde sâkine işbu râfi‘atü’l-vesîka Meryem Hâtun bt. es-Seyyid Mustafa Efendi tarafından hul‘-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan Mustafa b. Mahmud ve Emrullah b. Mehmed nâm kimesneler şehâdetleri ile şer‘an vekâleti sâbite olan büyük babası el-Hâc Yusuf b. Mehmed nâm kimesne mahzarında ikrâr ve takrîr-i kelâm edip müvekkile-i mezbûre Meryem Hâtun benim zevcem olup lâkin beynimizde şikāk [ve] adem-i vifâk vâki‘ olmağla zimmetimde mütekarrir ve ma‘kūdun aleyh olan sekiz bin akçe mehr-i müeccelinden ve nafaka-i iddet-i mu‘ayyene-i ma‘lûme ve me’ûnet-i süknâsından fâriğa olmak üzre mezbûr el-Hâc Yusuf benim ile müvekkile-i merkūme Meryem Hâtun için hul‘-ı merkūmu kabûl eyledikden sonra zevciyyete müte‘allika âmme-i de‘âvîden müvekkile-i mezbûrenin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Umdetü’l-müderrisîni’l-kirâm Ahmed Efendi b. Ali, Yusuf Efendi b. Ahmed, Mustafa Efendi b. (...), Hâfız Ahmed Efendi b. Muharrem, Süleyman Efendi b. Bâli (...)