Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 73 Hüküm no: 39 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Ahmed vakfına reaya kaydedilen Galata sakini Kostantin’in Sidrekapsili olmadığı ve buradan vergi istenmemesi gerektiği Kasaba-i Sidrekapsi’de sâkine kefere re‘âyâsı taraflarından "i‘mel bi re’yike fî küllî şey’in" masdûkunca vekîl-i müseccelleri olan Hırso v. Dimo nâm zimmî mahfil-i kazâda işbu râfi‘ü’s-sifr Kostantin v. Yorgi nâm zimmî muvâcehesinde bi’l-vekâle üzerine da‘vâ ve takrîr-i kelâm edip merkūm Kostantin kasaba-i merkūme re‘âyâsından olup târih-i kitâbdan on beş sene mukaddem celâ-yı vatan edip mahmiye-i Galata’da sâkin olmağla sinîn-i mezkûrda merkūm Kostantin’in üzerine edâsı lâzım gelen cizye ve sâir rüsûm-ı ra‘iyyeti taleb ederim suâl olunsun dedikde gıbbe’s-suâl merkūm Kostantin cevâbında ben kasaba-i mezbûre re‘âyâsından olmadığımdan mâ‘adâ mahmiye-i mezbûre merhûm ve mağfûrun leh Sultan Ahmed Hân evkāfından olup bir seneden ziyâde sâkin olan re‘âyâ tâifesine vakf-ı mezbûr zâbitleri vakf-ı mezbûra re‘âyâ kayd edip ve rüsûm-ı ra‘iyyetlerin vakıf için zabt etmek üzre yedlerinde müte‘addid evâmir-i şerîf-i cihân-mutâ‘ olmağla on beş seneden mütecâvizdir ki mahmiye-i mezbûre zâbitleri ber mûceb-i fermân-ı âlî beni vakf-ı merkūma re‘âyâ kayd edip cizye ve sâir rüsûm-ı ra‘iyyetimi ahz edip kasaba-i merkūmede alâka ve medhalim olmayıp ve bu bâbda yedimde şeyhülislâm hazretlerinden fetvâ-yı şerîfem dahi vardır deyû hâlâ şeyhülislâm müfti’l-enâm olup burhânü’l-fuzalâi’n-necâyir ve’l-ahâlî, ummânü bihârü’l-ulûm ve’l-me‘âlî, keşşâfü müşkilâti’d-dîniyye, hallâlü mu‘dilâti’l-yakīniyye, nûru hadakati’l-ilm ve’l-fetvâ, nûru hadîkati’l-ver‘ ve’t-takvâ, câmi‘ü fezâili’l-evâil ve’l-evâhir, ıkdü’l-mesâ’ili mahlûle bi esnân-i aklâmihi’l-münîfe ve mâ berihat suverü’l-fetvâ karînetün bi ecvibeti’ş-şerî‘ati’l-münteşir sît-i fezâil fi’l-âfâk hazret-i Yahya Efendi ünvânıyla mu‘anven fetvâ-yı şerîfe ibrâz edip muvâcehesinde feth ve kırâat olundukda da‘vâlarına muvâfık bulunmağın vekîl-i merkūm Hırso’yu vech-i ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Recebi’l-ferd li sene selâse ve seb‘în ve elf. Şuhûdü’l-hâl: Ahmed Efendi b. Ali, Musa Beşe b. Receb, Zülfikār b. İbrahim, Mustafa b. Süleyman, el-Hâc Cafer b. Yakub