Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 74 Hüküm no: 41 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Ağa b. Ali’nin muhallefatından kalan evin dörtte bir hissesinin varislerinden el-Hâc Hasan’a tahsis edildiğinin anlaşıldığı Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘den bu fakīr ve hâssa mi‘mârlarından üstâd Ali b. Abdullah ve zeyl-i kitâbda mastûrü’l-esâmî olan müslimîn ile kasaba-i Beşiktaş’da Râziye Hâtun mahallesinde vâki‘ menzil-i câ’i’z-zikre varılıp inde’l-vazî‘ ve’ş-şerîf akd-i meclis-i şer‘-i münîf olundukda mahalle-i mezbûre sükkânından el-Hâc Hasan b. Seyyid Ali nâm kimesne tarafından menzil-i mezbûrdan hissesini da‘vâ ve ahz ü kabz ve kendiye îsâle vekîl olup Ahmed Çelebi b. Ali ve Mehmed Çelebi b. Üveys Efendi şehâdetleri ile şer‘an vekâleti sâbite olan bâ‘isü hâze’l-kitâb Mehmed Çelebi b. el-Hâc Hasan nâm kimesne meclis-i ma‘kūd-ı mezbûrda mahalle-i mezbûre sükkânından iken bundan akdem vefât eden Cafer Ağa b. Ali Çelebi nâm müteveffânın li eb kız karındaşı Havva Hâtun tarafından husûmet ve redd-i cevâba vekîl olup mezbûreyi ma‘rifet-i şer‘iyye ile ârifân olan Kurd Çelebi b. Hayreddin ve Mustafa Çavuş b. Mehmed nâm kimesneler şehâdetleri ile şer‘an vekâleti sâbite olan Mehmed Ağa b. Mustafa mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Cafer Ağa müvekkilim mezbûr el-Hâc Hasan’ın li ebeveyn karındaşı Sâdık nâm müteveffânın oğlu Ali Çelebi’nin oğlu olup vefâtından sonra verâseti zevce-i metrûkesi Âişe Hâtun’a ve müvekkile-i mezbûre Havva Hâtun ile müvekkilim merkūm el-Hâc Hasan’a münhasıra olup muhallefâtının rub‘u zevcesi mezbûre Âişe Hâtun’a ve nısfı müvekkile-i merkūme Havva Hâtun’a ve mâ bakı müvekkilim mezbûr el-Hâc Hasan’a isâbet edip müteveffâ-yı mezbûrun muhallefâtından olup mahalle-i mezbûrede vâki‘ bir tarafdan el-Hâc Hüseyin mülkü ve bir tarafdan Cağalzâde Pâresi demekle meşhûr mîrî bahçe ve bir tarafdan Gonca Mehmed Çelebi mülkü ve bir tarafdan tarîk-i âm ile mahdûd iki bâb fevkānî ve üç bâb tahtânî odaları ve sofaları ve iki kenîfi ve bi’r-i mâyı müştemil menzilin bundan akdem mahmiye-i Galata’da kassâm-ı askerî olan Nâli Mehmed Efendi üzerine varıp ba‘de’l-keşf ve’l-mesâha menzil-i mezbûrun bahçesiyle cümle arsası tûlen ve arzan bi hesâb-ı terbî‘î beş bin yedi yüz zirâ‘a bâliğa olmağla dört sehim i‘tibâr olunup sihâm-ı mezbûreden müvekkilim mezbûr el-Hâc Hasan’ın bir sehim hissesi için Gonca Mehmed Çelebi tarafından bir bâb fevkānî ve bir bâb tahtânî ve kenîfi ve sokak kapısından Cağalzâde Pâresi duvarına varınca tûlen ve arzan bi hesâb-ı terbî‘î bin dört yüz yirmi beş zirâ‘ bahçeyi mûmâ-ileyh kassâm efendi huzûr-ı müslimînde ta‘yîn ve tahsîs eylemişiken müvekkile-i mezbûre Havva Hâtun tasarrufuna mâni‘a olur suâl olunup müvekkilim mezbûr el-Hâc Hasan’ın hissesinden kasr-ı yedine tenbîh olunmak matlûbumdur dedikde gıbbe’s-suâl vekîl-i mezbûr Mehmed Ağa husûs-ı mezkûru bi’l-külliyye münkir olucak müdde‘î-i mezbûr Mehmed Çelebi’den da‘vâsına muvâfık beyyine taleb olundukda mahalle-i mezbûre sükkânından olup udûl-i müslimînden Ahmed Ağa b. Mahmud ve Kadri Çelebi b. Mehmed ve Ahmed Çelebi b. Fazlı ve el-Hâc Hüseyin b. Mehmed nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd her biri fi’l-vâki‘ müteveffâ-yı mezbûr Cafer Ağa’nın muhallefâtı tahrîr ve beyne’l-verese taksîm olundukda menzil-i mezbûr ba‘de’l-keşf ve’l-mesâha bahçesiyle beş bin yedi yüz zirâ‘a bâliğa olmağla dört sehim i‘tibâr olunup sihâm-ı mezbûreden müvekkil-i mezbûr el-Hâc Hasan’a isâbet eden bir sehim hissesi için bir bâb fevkānî ve bir bâb tahtânî odayı ve nısf sofayı ve kenîfi ve sokak kapısından Cağalzâde bahçesine varınca tûlen ve arzan bi hesâb-ı terbî‘î bin dört yüz yirmi beş zirâ‘ bahçeyi kassâm-ı müşârün-ileyh bizim huzûrumuzda müvekkile-i mezbûre Havva Hâtun muvâcehesinde ta‘yîn ve tahsîs eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyete şerâiti’l-kabûl şehâdetleri makbûle olmağın mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Recebi’l-mürecceb li sene selâse ve seb‘în ve elf Şuhûdü’l-hâl: Hasan Efendi b. Mustafa el-İmâm, Hüseyin Çavuş el-Mübâşir, Abdi Usta b. Mehmed, Mustafa Çelebi b. Mehmed, Mehmed Çelebi b. İbrahim, Sefer b. Yusuf b. Habib, Mustafa Efendi b. Yusuf el-İmâm, Ahmed Çelebi b. Esad Efendi, İbrahim b. Mustafa, Ahmed Çelebi b. Mustafa, Ahmed Çelebi b. Fazlullah, Abdülkādir Çelebi b. Mehmed, Mehmed Çelebi b. Ali, el-Hâc Ahmed b. gulâm-ı bâkī