.:: İstanbul Kadı Sicilleri ::.


Galata Mahkemesi 90 Numaralı Sicil (H. 1073 - 1074 / M. 1663)
cilt: 40, sayfa: 76
Hüküm no: 42
Orijinal metin no: [5b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Cafer Ağa b. Ali’nin muhallefatının eşi Âişe, kız kardeşi Havva dışında dedesinin kardeşi el-Hâc Hasan’ın da varis olduğunun tespiti

Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘den bu fakīr zeyl-i kitâbda mastûrü’l-esâmî olan müslimîn ile mahmiye-i Galata müzâfâtından kasaba-i Beşiktaş’da Râziye Hâtun mahallesinde vâki‘ câmi‘-i şerîfe varıp akd-i meclis-i şer‘-i şerîf eyledikde mahalle-i mezbûre sükkânından olup işbu râfi‘ü’l-kitâb el-Hâc Hasan b. Seydi Ali tarafından husûs-ı âti’l-beyânı da‘vâ ve talebe vekîl olup Ahmed Çelebi b. Ali ve Mehmed Çelebi b. Üveys Efendi şehâdetleri ile şer‘an vekâleti sâbite olan Mehmed Çelebi b. el-Hâc Hüseyin meclis-i ma‘kūd-ı mezbûrda fi’l-asl vilâyet-i Anadolu’da Taraklı Borlu kazâsına tâbi‘-i Karayük nâm karyeden olup mahalle-i mezbûrede sâkin iken bundan akdem vefât eden Cafer Ağa b. Ali Çelebi nâm müteveffânın li eb kız karındaşı ve muhallefâtına vâzı‘atü’l-yed olan Havva Hâtun tarafından husûmet ve redd-i cevâba vekîl olup mezbûreyi ma‘rifet-i şer‘iyye ile ârifân olan Kurd Çelebi b. Hayreddin ve Mustafa Çavuş b. Mehmed şehâdetleri ile şer‘an vekâleti sâbite olan Mehmed Ağa b. Mustafa mahzarında bi’l-vekâle üzerine da‘vâ ve takrîr-i kelâm edip müvekkilim mezbûr el-Hâc Hasan müteveffâ-yı merkūm Cafer Ağa’nın babası Ali Çelebi’nin babası Sâdık ile li ebeveyn karındaşlar olup babaları ismi Seydi Ali ve dedeleri ismi Şehriman ve maskat-ı re’sleri karye-i mezbûreden olmağla müteveffâ-yı mezbûrun zevce-i metrûkesi Âişe Hâtun ile müvekkile-i mezbûre Havva Hâtun ve müvekkil-i mezbûr el-Hâc Hasan’a münhasıra olmağın muhallefât-ı müteveffâ-yı mezbûrdan müvekkil-i mezbûr el-Hâc Hasan’ın hisse-i şer‘iyyesini müvekkile-i mezbûreden bi’l-vekâle taleb ederim vekîl-i mezbûrdan suâl olunup alıverilmesi matlûbumdur dedikde gıbbe’s-suâl vekîl-i mezbûr Mehmed Ağa cevâbında müvekkilesi merkūme Havva Hâtun müteveffâ-yı mezbûrun muhallefâtına vâzı‘atü’l-yed idiğini ikrâr lâkin müvekkil-i mezbûr el-Hâc Hasan müteveffâ-yı mezbûrun vech-i muharrer üzre vârisi olduğunu inkâr edicek vekîl-i mezbûr Mehmed Çelebi’den takrîr-i meşrûhuna mutâbıka beyyine taleb olundukda fi’l-asl karye-i mezbûreden [6a] olup hâlâ mahalle-i mezbûre sükkânından olan Kurd Çelebi b. Hayreddin ve İbrahim Çelebi b. Ömer ve Yusuf b. Abdullah Beşe ve el-Hâc Hasan b. Ali nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müvekkil-i mezbûr el-Hâc Hasan müteveffâ-yı mezbûrun babası Ali Çelebi’nin babası merkūm Sâdık ile li ebeveyn karındaşlar olup babaları ismi Seydi Ali ve dedeleri ismi Şehriman ve maskat-ı re’sleri karye-i mezbûredir müteveffâ-yı mezbûrun verâseti zevce-i metrûkesi Âişe Hâtun ile kız karındaşı müvekkile-i mezbûr Havva Hâtun ve müvekkil-i merkūm el-Hâc Hasan’a münhasıra ve bunlardan gayrı vâris-i ma‘rûf ve terekesine müstehıkk-ı âhar olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene selâse ve seb‘în ve elf


Şuhûdü’l-hâl: Hasan Efendi b. Mustafa el-İmâm, Hüseyin Çavuş el-Mübâşir, Abdi Usta b. Mehmed, Mustafa Çelebi b. Mehmed, Mehmed Çelebi b. İbrahim, Receb b. Abdullah, Sefer b. Yusuf, el-Hâc Ahmed b. gulâm-ı bâkī, Mustafa Efendi b. Yusuf el-İmâm, Ahmed Çelebi b. Esad Efendi, İbrahim b. Mustafa, Ahmed Çelebi b. Mustafa, Ahmed Çelebi b. Fazlullah, Abdülkādir Çelebi b. Mehmed, Mehmed Çelebi b. Ali