Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 697 Hüküm no: 899 Orijinal metin no: [107b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Minas v. Kelaser’in, evini kızı Havva bt. Minas ile damadı Serkis v. Kedakus’a sattığı Mahrûse-i Galata müzâfâtından kasaba-i Beşiktaş’a tâbi‘ Ortaköy nâm karye sükkânından Minas v. Kelaser nâm zimmî meclis-i şer‘-i şerîfde dâmâdı olup kendi tarafından asl ve zevcesi Havva bt. Minas nâm nasrâniye tarafından husûs-ı âti’l-beyâna vekîl olduğu bimâ hüve tarîkü’s-sübût şer‘an sâbit olan Serkis v. Kedakus nâm zimmî mahzarında ikrâr ve takrîr-i kelâm edip akd-i âtînin sudûruna değin yedimde mülküm ve hakkım olup mahmiye-i İstanbul’da Tülbentçi Hüsam mahallesinde vâki‘ bir tarafdan Safar v. Serkis ve bir tarafdan düğmeci Roş v. Rat nâm zimmîler mülkleri ve bir tarafdan Nazlı nâm Ermeni’ye mülkü ve bir tarafdan tarîk-i âm ile mahdûd olup tabaka-i ulyâsında iki bâb oda ve tabaka-i vustâsında bir bâb oda ve bir mahzen ve tabaka-i süflâsında bir bâb oda ve altında bir mahzen ve bahçe ve kenîfi müştemil menzilimi kızım müvekkile-i mezbûre ile dâmâdım mezbûr Serkis’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin esedî guruşa bey‘ ve teslîm anlar dahi ale’l-iştirâki’s-seviy iştirâ ve tesellüm ettiklerinden sonra semen-i mezbûrun beş yüz esedî guruşunu mezbûre Havva yedinden ve beş yüz guruşunu dahi mezbûr Serkis yedinden tamâmen ahz u kabz eyledim, min ba‘d menzil-i mahdûd-ı mezbûrun nısf-ı şâyi‘i kızım mezbûre Havva’nın ve nısf-ı âharı dahi dâmâdım mezbûr Serkis’in mülk-i müşterâlarıdır keyfe mâ yeşâ’ân ve yahtârân mutasarrıfân olsunlar dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Halil Efendi [b.] İbrahim el-İmâm, İbrahim Halîfe b. ( ) el-Müezzin, Osman Beşe b. Abdullah, Abdullah Beşe, Ahmed Beşe b. Abdullah.