Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 78 Hüküm no: 45 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın Galata’daki evini Nikola’ya satması Vilâyet-i Anadolu’da Sapanca nâm kasaba sükkânından Mehmed Beşe b. Abdullah nâm mühtedî meclis-i şer‘-i hatîr-i lâzımü’t-tevkīrde bozacı tâifesinden râfi‘u hâze’l-kitâb Nikola v. Hristo nâm zimmî muvâcehesinde ikrâr ve takrîr-i kelâm edip silk-i mülk-i sahîhimde münselik olup mahmiye-i Galata hâricinde Santa Marika mahallesinde vâki‘ bir tarafdan terlikçi Toroş nâm zimmî mülkü ve iki tarafdan Mehmed Ağa odaları ve bir tarafdan tarîk-i âm ile mahdûd iki bâb fevkānî ve bir bâb tahtânî odalar ve muhavvata ve bir kenîfi ve zât-ı eşcâr-ı müsmire ve gayr-ı müsmire hadîkayı müştemil olan mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık on iki bin fıddî râyic fi’l-vakt akçeye merkūm Nikola’ya tarafeynden îcâb ve kabûlü hâvî bey‘-i mutlak ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mersûm mezbûr Nikola yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr mezbûr Nikola’nın mülk-i müşterâsı olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min şehri Şa‘bâni’l-mu‘azzam sene 1073 Şuhûdü’l-hâl: Mehmed Çelebi b. el-Hâc Mustafa, Abdülbâkī b. Hüseyin, Mustafa b. Ali, Abdülkādir b. Mehmed, Osman b. Yusuf, Mustafa Çelebi b. Receb, el-Hâc Cafer [b.] Yakub, el-Hâc Mehmed b. Ferruh