Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 79 Hüküm no: 47 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. Musa hayattayken Askeli’nin evini satın aldığı Askeli’nin varislerinin müdahalesinin önlenmesi gerektiği Husûs-ı âti’l-beyânın mahallinde keşf ve tahrîr[i] iltimâs olunmağın savb-ı şer‘den mevlânâ Nasuh Efendi irsâl olunup ol dahi zeyl-i kitâbda mastûrü’l-esâmî olan müslimîn ile münâza‘un fîh olan menzil-i câi’z-zikre varıp akd-i meclis-i şer‘-i şerîf eyledikde Hani cemâ‘atinden iken bundan akdem hâlik olan Yasef v. Musa nâm yahudinin verâseti zevce-i metrûkesi Kalvira nâm yahudiye ile sulbiye-i kebîre kızı Camide’ye ve li ebeveyn er karındaşı İlya’ya ve li ebeveyn kız karındaşı Sazyana nâm yahudiyeye münhasıra olmağla taraflarından zikr-i âtî menzili vâzı‘ü’l-yed olanlardan da‘vâya vekîlleri olup Yako v. Kemal ve Kemal v. Avraham yahudiler şehâdetleri ile şer‘an vekâleti sâbite olan işbu râfi‘ü’s-sifr Azarya v. Musa nâm yahudi meclis-i ma‘kūd-ı mezbûrda mahmiye-i Galata’da Sultan Bayezid mahallesinde sâkin iken bundan akdem gaybet-i münkatı‘a ile gāib olan Askeli v. ( ) nâm zimmînin sulbî kebîr oğlu Dimitraki ile sulbiye kebîre kızları Coya ve Kasandra ve Sultana ve Kokona ve Maryora nâm nasrâniyeler muvâcehelerinde bi’l-vekâle üzerlerine da‘vâ ve takrîr-i kelâm edip mahalle-i mezbûrede vâki‘ bir tarafdan Askeli mülkü ve ba‘zan Sultana bt. Frankoli mülkü ve bir tarafdan Karanfil v. ( ) mülkü ve bir tarafdan Kürkçü Nikola mülkü ve bir tarafdan Kirkor v. ( ) Ermeni mülkü ile mahdûd iki bâb tahtânî beyti ve bi’r-i mâyı ve şadırvan ve üç aded taş tekneli ve tûlen otuz altı ve arzan on bir buçuk bi hesâb-ı terbî‘î dört yüz on dört zirâ‘ zât-ı eşcâr-ı müsmire ve gayr-ı müsmireli bahçeyi müştemil olup işbu mu‘âyene olunan menzili bin altmış senesi Cumâdelûlâ’sının yirmi üçüncü günü gāib-i mezbûr Askeli müvekkillerimin mûrisi hâlik-i merkūm Yasef’e beş yüz riyâlî guruşa bey‘ ve kabz-ı semen eyledikden sonra târih-i mezbûrda kasaba-i Tophâne mahallesinde nâibü’ş-şer‘-i şerîf olan Mustafa Efendi huzûrunda varıp vech-i muharrer üzre bey‘ini ikrâr ve mûceb-i hüccet-i şer‘iyye dahi verip menzil-i mezkûr hâlik-i merkūmun mülk-i müşterâsı olup ba‘de helâkihî veresesine intikāl etmişiken mezbûrlar bî-vech zabt ve tasarruf ettiler hâlâ suâl olunup menzil-i mezkûr tahliye ve bana teslîme mezbûrelere tenbîh olunması matlûbumdur deyû nâib-i mûmâ-ileyhin imzâsıyla mümzâ ve hatmi ile mahtûm ve târih-i mezkûr ile müverrah ve min külli’l-vücûh takrîri meşrûhuna mutâbık hüccet-i şer‘iyye ibrâz edip ba‘de’l-feth ve’l-kırâe ve isre’l-istintâk mezbûrlar dahi mazmûn-ı hüccet-i mezbûreyi ikrâr ve i‘tirâf etmeğin mûcebiyle menzil-i mezbûr tahliye ve müdde‘î-i merkūma teslîm ve mezbûrların her birine ba‘de’t-tenbîh vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Efendi ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-ışrîn min şehri Recebi’l-ferd sene 1073 Şuhûdü’l-hâl: Musa Çavuş b. Abdullah, Mehmed Beşe b. Mustafa Çukadâr, el-Hâc Cafer b. Yakub, Mustafa b. Receb, Abdülbâkī b. Mustafa