Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 80 Hüküm no: 48 Orijinal metin no: [7b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Efendi’nin Mekke payesiyle Galata kadılığına atanması Fazîletli Yahya Efendi hazretlerine pâdişâh-ı âlem-penâh hazretlerinin Galata kazâsı inâyet ve ihsân buyurdukları emr-i âlînin sûretidir Akzâ kuzâti’l-müslimîn evlâ vülâti’l-muvahhidîn ma‘deni’l-fazli ve’l-yakīn hüccetü’l-hakki ale’l-halki ecma‘în vârisü ulûmi’l-enbiyâi ve’l-mürselîn el-muhtassu bi mezîd-i inâyeti’l-meliki’l-mu‘în Medîne-i münevvere pâyesiyle sâbıkan Yenişehir kadısı olan mevlânâ Yahya -zîdet fezâihulû- tevkī‘-i refî‘-i hümâyûn vâsıl olucak ma‘lûm ola ki, sen ehl-i ilm ve sâhib-i fazîlet olup tarîk-i ilmin kudemâsından olduğun ecilden hâliyâ hakkında mezîd merhamet-i pâdişâhânem zuhûra getirip işbu sene selâse ve seb‘în ve elf Şa‘bân’ının ikinci gününden Galata kazâsını Mekke-i mükerreme pâyesiyle sana tevcîh ve inâyet edip i‘lâmı için ( ) ta‘yîn olunmuşdur buyurdum ki, vusûl buldukda sâdır olan fermân-ı celîlü’l-kadrim üzre te’hîr ve tevakkuf etmeyip varıp Galata kazâsına Mekke-i mükerreme pâyesiyle mutasarrıf ve ahâlîsi beyninde icrâ-yı ahkâm-ı şer‘iyye-i Nebevî ve infâz-ı evâmir-i aliyye-i Mustafavî sallallâhu alâ şâri‘ihâda bezl-i iktidâr edip âdemin gönderip berâtın ihrâc ettiresin şöyle bilesin alâmet-i şerîfe i‘timâd kılasın. Tahrîren fî evâili şehri Şa‘bâni’l-mu‘azzam li sene selâse ve seb‘în ve elf Be makām-ı Kostantıniyye