Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 81 Hüküm no: 51 Orijinal metin no: [7b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avram v. Musa’nın kendisine ait evin yarı hissesini Yahuda v. David’e satması Mahmiye-i Galata müzâfâtından Beşiktaş nâhiyesine tâbi‘ Ortaköy demekle ma‘rûf karyede sâkin Kiraz cemâ‘atinden Avraham v. Musa nâm yahudi meclis-i şer‘-i hatîr-i lâzımü’t-tevkīrde cemâ‘at-i mezbûreden işbu râfi‘ü’s-sifr Yahuda v. David nâm yahudi muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan Hamalı Mehmed Ağa mülkü ve bir tarafdan Rüstem nâm bostanî mülkü ve bir tarafdan tarîk-i hâs ve bir tarafdan tarîk-i âm ile mahdûd üç bâb fevkānî odaları ve bir selâmlık ve bir matbah ve bir tahta-pûşu iki bâb tahtânî odaları ve bir matbah ve iki mahzen ve bi’r-i mâyı ve kenîfi müştemil olup arsasının senede Sultan Bayezid Hân aleyhi’r-rahmeti ve’l-gufrân hazretleri evkāfına elli akçe mukāta‘ası olan menzilin nısf-ı şâyi‘i oğlum işbu hâzır bi’l-meclis Musa nâm yahudinin mülkü olup ve nısf-ı şâyi‘-i âharı bundan akdem hâlik olan sulbî oğlum Arslan nâm yahudiden irs-i şer‘le intikāl eylediği cihetden benim mülküm olmağla hâlâ menzil-i mahdûd-ı mezkûrdan ber vech-i muharrer mülküm olan nısf-ı şâyi‘-i mezkûremi mezbûr Yahuda’ya elli bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm eyledikden sonra semeni olan meblağ-ı mezbûr elli bin akçeyi yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûrdan mülküm olan nısf-ı şâyi‘ merkūm müşterî-i mezbûr Yahuda’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Ahmed Yazıcı b. Mehmed, Mehmed b. Receb, Siyavuş b. Abdullah, Abdülkerim Efendi b. Mehmed, Abdülbâkī Bey b. Ser-muhzırân, Mehmed Efendi b. Hüseyin el-Kâtib, Musa v. Yasef, Avram v. Baryam, İsak v. Avraham, Liyazer v. Aluş, Matya v. Rosi, Mehmed Efendi b. Mahmud el-İmâm, İbrahim Halîfe b. Halil el-Müezzin, Mustafa Hoca b. Hüseyin, Mehmed Bey b. Memi el-Hammâmî