Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 698 Hüküm no: 900 Orijinal metin no: [107b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitraşko v. Berede’nin eşkıyadan olduğu ve çeteyle birlikte evleri basıp eşya çaldığı Husûs-ı âti’l-beyânın mahallinde tahrîri iltimâs olunmağın hadîka-i hâssa hâricinde vâki‘ Yalıköşkü demekle ma‘rûf köşke varılıp zeyl-i rakīmde muharrerü’l-esâmî olan müslimîn ile hâlâ bostancıbaşı olup sürrâk ve kuttâ‘-ı tarîki ahza memûr olan iftihârü’l-emâcid ve’l-mekârim câmi‘ü’l-mehâsin ve’l-mekârim el-Hâc Mustafa Ağa huzûrunda akd-i meclis-i şer‘-i şerîf olundukda mûmâ-ileyh el-Hâc Mustafa Ağa meclis-i ma‘kūd-ı mezbûrda fi’l-asl diyâr-ı Eflak’da Bükreş nâm karyeden olup hâlâ mahrûse-i Galata müzâfâtından kasaba-i İstinye’ye tâbi‘ Büyükdere nâm karyede sâkin olup ırgad tâifesinden olan Dimitraşko v. Berede nâm zimmî muvâcehesinde takrîr-i kelâm ve ta‘bîr ani’l-merâm edip mezbûr Dimitraşko bundan akdem eşkiyâdan birkaç kimesneler ile cem‘ olup medîne-i Üsküdar’da meskenleri basıp nice fesâd etmişlerdir suâl olunup takrîrleri tahrîr olunmak matlûbumdur dedikde gıbbe’s-suâl mezbûr Dimitraşko cevâbında bundan akdem ahz ve katl olunan Mustafa ve yoldaşları ve gāibân ani’l-meclis Balaban ve Bilas nâm zimmîler ile cem‘ olup her birimizin elinde âlet-i harb olduğu hâlde gece ile meskenleri basıp bir evin duvarını delip ben ve bir kaçımız içeri girip ev sâhibi akçem mesciddedir demekle çıkıp mescide varıp aldığı eşyâdan benim hisseme ancak otuz akçe kıymetli işbu ester düşdü dedikde vâki‘ü’l-hâl bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Ali Efendi b. Mustafa İmâm-ı bostancıbaşı, Abdullah Efendi b. Mehmed İmâm-ı mahalle-i Debbâğ Yunus, Ahmed Bey b. Ali, Mehmed Bey b. Ahmed, Selim Bey b. Abdülmennân, Hacı İbrahim Bey, Mustafa Bey.