Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 82 Hüküm no: 53 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Reis’in Mustafa Kapudân’a ait olup zayi ettiği sefine toplarının parasını ödemesi Mahmiye-i Galata hâricinde Müeyyedzâde mahallesinde sâkin Mustafa Kapudân b. Ali nâm kimesne meclis-i şer‘-i hatîr-i lâzımü’t-tevkīrde râfi‘-i hâze’l-kitâb Yahya Reis b. Receb nâm kimesne mahzarında ikrâr ve takrîr-i kelâm edip bundan akdem silk-i mülkümde münselik olan iki aded İngiliz ve iki aded eynekli ta‘bîr olunur cem‘an dört aded sefîne toplarımı mezbûr Yahya Reis fuzûlen ahz ü kabz ve sefînesine vaz‘ edip helâk etmekle zikr olunan topları kıymet-i şer‘iyyelerini mezbûr Yahya Reis’den taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimizde muslihûn tavassut edip da‘vâ-yı mezkûremden ikrârını dokuz bin beş yüz akçe bedel üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr dokuz bin beş yüz akçeyi mezbûr Yahya Reis yedinden bi’t-tamâm ve’l-kemâl ahz ü kabz edip zikr olunan toplara ve kıymetlerine müte‘allika âmme-i de‘âvâdan mersûm Yahya Reis’in zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Sâlih Hoca b. ( ), Mehmed Çelebi b. ( ), Kurd b. Mehmed, el-Hâc Veli b. ( ), Mustafa b. Receb, Mehmed b. Receb, Ahmed Yazıcı b. Mehmed, Emrullah b. Mehmed ve gayruhüm