Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 83 Hüküm no: 54 Orijinal metin no: [8a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mustafa’nın Mustafa Beşe b. Hasan’a pastırma satışından borcu olduğunu kabul etmesi Mahrûsa-i İstanbul hısnı hâricinde vâki‘ Hasır iskelesinde tüccâr tâifesinden râfi‘-i hâze’l-kitâb Mustafa Beşe b. Hasan mahfil-i kazâda Ahmed b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan bir ay mukaddem her kantar beşer yüz altmış beşer akçeden altı kantar otuz beş vakıyye pastırmamı cem‘an üç bin sekiz yüz altmış dört akçeye merkūm Ahmed’e bey‘ ve teslîm ol dahi vech-i muharrer üzre iştirâ ve tesellüm ve kabûl etmeğin hâlâ semeni olan meblağ-ı mezbûru merkūm Ahmed’den taleb ederim suâl olunup alıverilmesi matlûbumdur dedikde gıbbe’s-suâl merkūm Ahmed cevâbında fi’l-vâki‘ müdde‘î-i mezbûrun yedinden târih-i merkūmda iştirâ ve kabz eylediğim altı kantar ve otuz beş vakıyye pastırması semeninden zimmetimde üç bin sekiz yüz altmış dört akçe mezbûr Mustafa Beşe’ye lâzımü’l-edâ ve vâcibü’l-kazâ deynim vardır deyû ikrâr ve i‘tirâf etmeğin ikrârı mûcebince meblağ-ı merkūmu müdde‘î-i mersûma edâ ve teslîme merkūm Ahmed’e tenbîh birle mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Mustafa Çelebi b. Receb, Emrullah b. Mehmed, Âbid b. Mustafa ve gayruhüm mine’l-huzzâr