Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 84 Hüküm no: 55 Orijinal metin no: [8a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal İsteryo’nun Yamandi’deki alacağının Yamandi’nin vekili Hasan Reis’den alınması Mahmiye-i Galata’da bakkal tâyifesinden İster[yo] v. Yorgi nâm zimmînin tarafından husûs-ı âti’l-beyâna vekîl olup bimâ hüve nehcü’s-sübût şer‘an vekâleti sâbite olan Yamandi nâm zimmî meclis-i şer‘-i hatîr-i lâzımü’t-tevkīrde rüesâ tâyifesinden bâ‘is-i hâze’l-kitâb Hasan Reis b. İsa nâm kimesne mahzarında üzerine bi’l-vekâle da‘vâ ve takrîr-i kelâm edip mezbûr Hasan Reis zimmetinde müvekkil-i mezbûrun yedinden müşterâ ve makbûz beynlerinde ilm-i şer‘î ile ma‘lûm bakkal metâ‘ı bahâsından ba‘de küllî hesâb bin üç yüz akçe hakkı vardır hâlâ meblağ-ı mezbûru vekâletim hasebiyle mezbûr Hasan Reis’den taleb eylerim suâl olunsun dedikde gıbbe’s-suâl mezbûr Hasan Reis cevâbında fi’l-vâki‘ müvekkil-i merkūma vech-i muharrer üzre bakkal metâ‘ı bahâsından ba‘de külli hesâb zimmetimde bin üç yüz akçe deynim olup lâkin meblağ-ı mezbûru mukaddemâ mezbûr Yamandi’ye vekâleti hasebiyle tamâmen edâ ve teslîm eyledim deyû def‘le mukābele edicek gıbbe’l-istintâk ve’l-inkâr müdde‘î-i mezbûrdan def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka vech-i muharrer üzre meblağ-ı mezbûr bin üç yüz akçeyi bi’l-vekâle müdde‘î-i mezbûr Hasan Reis yedinden ahz ü kabz eylediğine mezbûr Yamandi’ye yemîn teklîf olundukda ol dahi yemînden nükûl etmeğin mûcebince mezbûr Yamandi mu‘ârazadan men‘ birle mâ vaka‘a bi’t-taleb ketb olundu. Fî yevm-i 5 min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Musa [Beşe b. Receb], Ahmed Yazıcı b. Mehmed, Siyavuş b. Abdullah, Âbid b. Mustafa, Hüseyin b. Abdullah, Mehmed b. Ali, Hasan b. ( ) ve gayruhüm