Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 84 Hüküm no: 56 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihayil v. Yorgi’nin fıtık ameliyatı sebebiyle İstati v. Yani’yi mesul tutmayacağı Mahmiye-i Galata müzâfâtından kasaba-i Fındıklı’da vâki‘ bakkal tâifesinden Mihayil v. Yorgi nâm zimmî meclis-i şer‘-i hatîr-i lâzımü’t-tevkīrde râfi‘ü’l-kitâb İstati v. Yani nâm cerrâh mahzarında ikrâr ve takrîr-i kelâm edip ben maraz-ı fıtıka mübtelâ olup merkūm İstati maraz-ı mezkûra ilâcda ehil olmağla mezbûr İstati maraz-ı mezkûruma ilâc ve timar etmek için müddet-i ma‘lûme tamâmına değin fıddî râyic fi’l-vakt bin yüz akçe ücretle nefsini bana îcâr ben dahi vech-i muharrer üzre istîcâr ve mu‘tâdı üzre kasığımı şak ve münfetik olan mevzi‘in kat‘ için mezbûre emr edip eğer beni mezbûrun vech-i muharrer üzre şak ve kat‘ının sirâyeti sebebi ile helâk olursam dem ve diyetime müte‘allik olan da‘vâdan mezbûrun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Âbid b. Mustafa, Mustafa Çelebi b. Receb, Ahmed Yazıcı b. Mehmed, Emrullah b. Mehmed ve gayruhüm