Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 85 Hüküm no: 58 Orijinal metin no: [8b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eşi Râbia bt. Mehmed’den kendisine intikal eden ev hissesini Mustafa Beşe’ye satan Muharrem’in evi teslim etmesinin gerektiği Mahmiye-i Galata müzâfâtından kasaba-i Kasımpaşa’da el-Hâc Ahmed mahallesinde sâkine iken bundan akdem vefât eden Râbia bt. Mehmed nâm hâtunun verâseti zevc-i metrûkü el-Hâc Muharrem b. Ali ile babasının li ebeveyn kız karındaşı oğlu Mustafa Beşe b. Yahya nâm kimesneye münhasır olduğu şer‘an zâhir ve mütehakkik oldukdan sonra işbu râfi‘ü’l-kitâb mezbûr Mustafa Beşe meclis-i şer‘-i hatîr-i lâzımü’t-tevkīrde merkūm el-Hâc Muharrem mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan el-Hâc Ahmed vakfı ve bir tarafdan ba‘zan imâma meşrûta vakıf menzil ve ba‘zan Emine Hâtun mülkü ve iki tarafdan tarîk-i âm ile mahdûd bir bâb fevkānî ve bir tahtânî odaları ve iki ahırı ve bir süt ahırı ve bi’r-i mâyı ve kenîfi ve avlu ve zât-ı eşcâr-ı müsmire ve gayr-ı müsmire ve bahçeyi müştemil mülk menzil müteveffât-ı mezbûre Râbia Hâtun’un ile’l-vefât mülkü olup ba‘de vefâtihâ menzil-i mezkûrun nısfı bana ve nısf-ı âharı merkūm el-Hâc Muharrem’e intikāl ve isâbet etmekle merkūm el-Hâc Muharrem menzil-i mahdûd-ı mezkûrdan kendiye isâbet eden nısf hisse-i şer‘iyyesini târih-i kitâbdan on gün mukaddem yirmi bin fıddî râyic fi’l-vakt akçeye bana bey‘-i bâtt-ı sahîh-i şer‘î ile bey‘ edip ben dahi vech-i muharrer üzre iştirâ ve kabz eylediğimden sonra semeni olan meblağ-ı mezbûru târih-i merkūmdan on gün tamâmına değin te’cîl eyleyip menzil-i mezkûrun nısf-ı âharı dahi mülk ve müşterâm olmuşiken hâlâ semen-i mezbûru kendiye teslîm ve menzil-i mezkûru zabt etmek irâde eylediğimde teslîmden imtinâ‘ eder suâl olunup semen-i mezbûru ahz ve mebî‘-i mezkûru bana teslîme merkūm el-Hâc Muharrem’e tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrun müdde‘âsını mübeyyine beyyine taleb olundukda udûl-i müslimînden olup mahalle-i mezbûre sâkinlerinden Halil Ağa b. İdris ve Ali Çelebi b. el-Hâc Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ merkūm el-Hâc Muharrem târih-i kitâbdan on gün mukaddem menzil-i mahdûd-ı mezkûrdan nısf hisse-i şer‘iyye-i merkūmesin yirmi bin fıddî nakd-i râyic fi’l-vakt akçeye mezbûr Mustafa Beşe’ye bizim huzûrumuzda bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûru târih-i mezbûrdan on gün tamâmına değin te’cîl eyledi biz husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcebiyle semen-i mezkûru ahz ve menzil-i mahdûd-ı mezkûrdan nısf hisse-i şer‘iyyesin müdde‘î-i mezbûre teslîme merkūm el-Hâc Muharrem’e tenbîh birle mâ vaka‘a bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Mehmed Efendi b. el-Hâc Musa, İbrahim Efendi el-İmâm, es-Seyyid Mehmed Efendi b. es-Seyyid Ali el-İmâm, Mahmud Efendi b. Mehmed, Hasan b. Şaban