Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 699 Hüküm no: 901 Orijinal metin no: [107b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eflak Nikola’nın eşkıyadan olduğu ve çeteyle birlikte evleri basıp eşya çaldığı Husûs-ı âti’l-beyânın mahallinde tahrîri iltimâs olunmağın hadîka-i hâssa hâricinde vâki‘ Yalıköşkü demekle ma‘rûf köşke varıp zeyl-i rakīmde muharrerü’l-esâmî olan müslimîn ile hâlâ bostancıbaşı olup sürrâk ve kuttâ‘-ı tarîki ahza memûr olan iftihârü’l-emâcid ve’l-mekârim câmi‘ü’l-mehâsin ve’l-mekârim el-Hâc Mustafa Ağa meclis-i şer‘-i şerîf olundukda mûmâ-ileyh el-Hâc Mustafa Ağa meclis-i ma‘kūd-ı mezbûrda fi’l-asl vilâyet-i Rumeli’nde İsmailgeçidi kasabasında ve Domuzpazarı mahallesi ahâlîsinden olup ırgad tâifesinden olan Eflak Nikola v. ( ) nâm zimmî mahzarında takrîr-i kelâm ve ta‘bîr ani’l-merâm edip mezbûr Nikola bundan akdem eşkiyâdan birkaç kimesneler ile cem‘ olup mahrûse-i Üsküdar hâricinde meskenleri basıp nice fesâd etmişlerdir, suâl olunup takrîrleri tahrîr olunmak matlûbumdur dedikde, gıbbe’s-suâl mezbûr Nikola cevâbında elimde baltam olduğu hâlde işbu Dimitraşko ve gāibân ani’l-meclis Bilas ve Balaban nâm zimmîler bundan akdem ahz ve katl olunan Mustafa Bey ve yoldaşları ile bir yerde cem‘ olup gece ile mukaddemâ mahrûse-i Üsküdar hâricinde vâki‘ meskenleri basıp bir evin duvarını delip içine girip ev sâhibine akçen nerdedir dedikde mesciddedir demekle evden çıkıp mescide varıp ancak bir eski gömlek alıp gitmek mümkün olmamağla atı veririm deyû ikrâr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Sâbikūn.