Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 93 Hüküm no: 64 Orijinal metin no: [10b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan b. Mihayil’in Murad b. Abdullah’tan aldığı alacağını ikinci defa talep etmediğine yemin etmesi Balıkçı tâifesinden Murad b. Abdullah nân kimesne mahfil-i kazâda yine tâife-i merkūmeden olup sıvacı cemâ‘atinden işbu hâmilü’s-sifr Aslan v. Mihayil nâm yahudi muvâcehesinde üzerine da‘vâ ve takrîr-i kelâm edip târih-i kitâbdan sekiz sene mukaddem merkūm Aslan’dan aded[i] beynimizde ma‘lûm bin yedi yüz akçelik balık iştirâ ve semeni olan meblağ-ı merkūm yedimden bi’t-tamâm ahz ü kabz etmişken yine merkūm Aslan hilâf-ı şer‘ benden tekrâr bin yedi yüz akçe dahi ahz ü kabz etmişdir hâlâ benden tekrâr aldığı meblağ-ı mezbûru merkūmdan istirdâd murâd ederim suâl olunsun dedikde gıbbe’s-suâl ve akībe’l-inkâr müdde‘î-i merkūmdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ müdde‘î-i mezbûr hilâf-ı şer‘ tekrâr bin yedi yüz akçe dahi ahz eylemediğine mezbûr Aslan’a yemîn teklîf olundukda ol dahi alâ vefki’l-mes’ûl yemîn billâhi’llezî enzele’t-Tevrâte alâ Musa aleyhi’s-selâm etmeğin mûcebiyle müdde‘î-i merkūm Murad bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Mumcu Mehmed Beşe b. Osman, Mahmud b. Ali, Dilâver b. Abdullah, Musa b. Receb, Hüseyin b. Münir, Emrullah b. Mehmed, Mehmed Çelebi b. Abdi