Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 94 Hüküm no: 65 Orijinal metin no: [11a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ı esaretten fidyesini vererek kurtaran Kapudân Andriye’ye borcu olduğunu ikrarı Vilâyet-i Rumeli’nde Vize kazâsına tâbi‘ Papola nâm karyede sâkin Ahmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu râfi‘ü’s-sifr Kapudân Andriye v. Gabril nâm müste’men muvâcehesinde bi’t-tav‘i’s-sâf ikrâr-ı tâm ve ta‘bîri ani’l-merâm edip târih-i kitâbdan sekiz sene mukaddem Malta keferesinden Seranyoz Anton nâm harbî beni esîr edip zindanında mahbûs iken bundan akdem mezbûr Kapudân Andriye emrim ile merkūm Seranyoz Anton’a üç yüz elli iki buçuk tâmmü’l-vezn ve sahîhü’l-ayâr riyâlî guruş verip beni tahlîs etmişdi el-hâletü hâzihî meblağ-ı mezbûr üç yüz iki buçuk tâmmü’l-vezn ve sahîhü’l-ayâr riyâlî minvâl-i muharrer üzre mezbûr Kapudân Andriye’ye zimmetimde lâzımü’l-edâ ve vâcibü’l-kazâ deynimdir dedikde gıbbe’t-tasdîki’ş-şer‘î mâ vaka‘a bi’t-taleb ketb olundu Şuhûdü’l-hâl: Es-Sâbıkūn.