Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 95 Hüküm no: 67 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ı esaretten kurtaran Kapudân Andriye’ye fidye borcu olduğunu ikrarı Vilâyet-i Rumeli’nde vâki‘ Vize kazâsına tâbi‘ Papola nâm karyede sâkin Ahmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu râfi‘ü’s-sifr Kapudân Andriye v. Gabril nâm müste’men muvâcehesinde bi’t-tav‘i’s-sâf ikrâr-ı tâm ve takrîr-i kelâm edip târih-i kitâbdan iki buçuk sene mukaddem Malta keferesinden Seranyoz Anton nâm harbî beni esîr edip zindanda mahbûs iken bundan akdem mezbûr Kapudân Andriye emrim ile merkūm Seranyoz Anton’a üç yüz elli iki buçuk tâmmü’l-vezn ve sahîhü’l-ayâr riyâlî guruş verip beni tahlîs etmişidi el-hâletü hâzihî meblağ-ı mezbûr üç yüz iki buçuk tâmmü’l-vezn ve sahîhü’l-ayâr riyâlî guruş minvâl-i meşrûh üzre mezbûr Andriye Kapudân Andriye’ye zimmetimde lâzımü’l-edâ ve vâcibü’l-kazâ deynimdir dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâdis ve’l-ışrîn min Şa‘bâni’l-mu‘azzam li sene 1073 Şuhûdü’l-hâl: Es-Sâbıkūn.