Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 96 Hüküm no: 70 Orijinal metin no: [11a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üstad Receb b. Nasuh’un vakfa ait evinin tasarrufunu eşi Sâliha bt. Şaban’a devretmesi Mahrûsa-i Galata hâricinde Sarı Lütfi mahallesinde sâkin üstâd Receb b. Nasuh nâm kimesne meclis-i şer‘-i hatîr-i lâzımü’t-tevkīrde zevcesi işbu râfi‘atü’l-vesîka Sâliha bt. Şaban nâm hâtun mahzarında ikrâr ve takrîr-i kelâm edip zikr olunan Sarı Lütfi vakfı’ndan olup icâre-i mu‘accele-i ma‘lûme ve beher mâh elli beşer akçe ücret-i müeccele ile tasarrufunda olan mahalle-i merkūmede vâki‘ bir tarafdan Mehmed Reis b. ( ) mülkü ve bir tarafdan mekābir-i müslimîn ve iki tarafdan vakf-ı mezbûr ile mahdûd iki bâb tahtânî oda [10(2)b] ları ve bir kenîfi ve zât-ı eşcâr-ı müsmire ve gayr-ı müsmire bahçeyi müştemil olan menzilimin hakk-ı tasarrufunu ma‘rifet-i mütevellî ile dört bin fıddî râyic fi’l-vakt akçe bedel mukābelesinde merkūme Sâliha Hâtun’a ferâğ ve tefvîz ol dahi vech-i muharrer üzre tefevvuz ve kabûl eyledikden sonra bedel-i ferâğ olan meblağ-ı mezbûr dört bin akçeyi mezbûre Sâliha Hâtun’un yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr mezbûrenin hakk-ı müfevvazıdır. Keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb ve terkīm olundu. Hurrire fi’l-yevmi’s-sâmin ve’l-ışrîn li sene selâse ve seb‘în ve elf Şuhûdü’l-hâl: Şaban Çelebi b. Ahmed kāimmakām-ı mütevellî-i vakf-ı mezbûr, Mehmed Çelebi b. Ahmed el-Kâtib, Ahmed Yazıcı b. Mehmed, Mustafa Çelebi b. Receb, Âbid b. Mustafa