Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 97 Hüküm no: 71 Orijinal metin no: [10(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Yusuf’un varislerinden oğlu Yusuf Çelebi’nin babasının Mustafa Beşe’ye verdiği borç davasında sulh olduğu Mahmiye-i Galata müzâfâtından kasaba-i Beşiktaş’da vâki‘ Cağalzâde bahçesi demekle ma‘rûf hadîka-i sultânî ustası iken bundan akdem vefât eden Mustafa Ağa b. Yusuf’un verâseti zevce-i metrûkeleri Sâliha bt. Abdullah ve Fâtıma bt. ( ) ve Mücellâ bt. Abdullah nâm hâtunlar ile sulbî kebîr oğulları Yusuf Çelebi ve Mehmed Çelebi’ye ve sulbiye-i kebîre kızı Âişe’ye münhasıra olduğu şer‘an zâhir ve mütehakkik oldukdan sonra mezbûr Yusuf Çelebi meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mustafa Beşe b. Abdullah nâm kimesne mahzarında ikrâr ve takrîr-i kelâm edip babam müteveffâ-yı mezbûr hâl-i hayâtında mezbûr Mustafa Beşe ile gāib ani’l-meclis Bayram Beşe b. Abdullah’a beşer bin yüz akçe ki cem‘an on bin iki yüz akçe ikrâz ve teslîm ol dahi vech-i muharrer üzre iktirâz ve tesellüm edip her biri âharın zimmetine lâzım gelen meblağa dahi kefîl olduklarından sonra kable’l-ahz ve’l-istîfâ vefât edip merkūmânın zimmetlerinde kalmağın meblağ-ı mezbûrdan hisse-i şer‘iyyeme isâbet eden üç bin beş yüz yetmiş akçeyi asâlet ve kefâleti cihetinden mezbûr Mustafa Beşe’den mukaddemâ da‘vâ ve taleb edip ol dahi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî vesâtat-ı muslihîn ile mezbûr Mustafa Beşe da‘vâ-yı mezkûremden beni an inkâr sekiz yüz akçe bedel üzerine sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr sekiz yüz akçeyi yedinden bi’t-tamâm ahz ü kabz edip mâ‘adâ da‘vâsından mezbûr Mustafa Beşe’nin asâlet [ve] vekâleti cihetle zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d mezbûr Mustafa Beşe ile hisse-i merkūmeme müte‘allika vechen mine’l-vücûh da‘vâ ve nizâ‘ım yokdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: İbrahim Beşe b. Abdülkerim, Şaban Çelebi b. Mustafa, Receb Beşe b. Nasuh el-Hallâk, Mehmed Çelebi b. İbrahim, el-Hâc Süleyman b. Pazarcı, Mehmed b. Ali el-Hallâk