Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 699 Hüküm no: 902 Orijinal metin no: [107b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şirmerd v. Kor’un eşkıyadan olduğu ve çeteyle birlikte Fethi Beyzâde Çiftliği’ni basıp eşya çaldığı Husûs-ı âti’l-beyânın mahallinde tahrîri iltimâs olunmağın mahmiye-i İstanbul’da hadîka-i hâssa hâricinde vâki‘ Yalıköşkü demekle ma‘rûf köşke varılıp zeyl-i rakīmde muharrerü’l-esâmî olan müslimîn ile hâlâ bostancıbaşı olup sürrâk ve kuttâ‘-ı tarîki ahza memûr olan iftihârü’l-emâcid ve’l-ekârim câmi‘ü’l-mehâsin ve’l-mekârim el-Hâc Mustafa Ağa huzûrunda akd-i meclis-i şer‘-i şerîf olundukda mûmâ-ileyh Mustafa Ağa meclis-i şer‘-i mezbûrda fi’l-asl vilâyet-i Rumeli’nde Dubniçe kazâsına tâbi‘ Viranye nâm karye ahâlîsinden olup hâlâ vilâyet-i mezbûrda kasaba-i Çatalca’ya tâbi‘ Tilkiköy nâm karyede vâki‘ vakıf mandırada danacı olan Şirmerd v. Kor nâm zimmî mahzarında takrîr-i kelâm ve takrîr-i merâm edip mezbûr Şirmerd ve bundan akdem eşkiyâdan birkaç kimesneler ile cem‘ olup medîne-i Ebî Eyyûb’a tâbi‘ Davudpaşa kurbunda Fethi Beyzâde çiftliğini basıp nice fesâd etmişlerdir suâl olunup takrîri tahrîr olunmak matlûbumdur dedikde gıbbe’s-suâl mezbûr Şirmerd cevâbında hâzır bi’l-meclis Karaca Nikola ve gāibûn ani’l-meclis Balaban ve Bilas ve Esteban Terko ve diğer sakallı Bulgar Esteban ile cem‘ olup bundan akdem gece ile zikr olunan çiftliği basıp aldığım eşyâyı beynimizde iktisâm ettiğimizde benim hisseme seksen akçe kıymetli bir kırmızı iskarlet diz çakşırı isâbet etmişidi dedikde mâ vaka‘a bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Sâbikūn.