Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 100 Hüküm no: 78 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma’ya babası Derviş’den kalan mirası almak üzere Yusuf Beşe b. Hamza’nın vekil tayin edilmesi Medîne-i Üsküdar müzâfâtından Taşköprü nâhiyesine tâbi‘ Bektaşlı nâm karye sükkânından işbu râfi‘ü’l-kitâb Yusuf Beşe b. Hamza nâm kimesneden alâ vechi’l-âtî da‘vâ-yı sahîha-i şer‘iyye ile mesbûk istişhâd-ı şer‘î-i sudûrundan sonra udûl-i müslimînden olup karye-i mezbûre sükkânından Mahmud b. İbrahim ve İbrahim b. Yusuf nâm kimesneler li ecli’ş-şehâde meclis-i şer‘a hâzırân olup hasm-ı şer‘î-i câhid mahzarında edâ-i şehâdet-i şer‘iyye eylediler ki mahmiye-i Galata müzâfâtından kasaba-i Tophâne’de Beyoğlu mahallesinde sâkin iken bundan akdem vefât eden Derviş nâm kimesnenin verâseti zevce-i metrûkesi Mücellâ’ya ve sulbî kebîr oğlu İsmail’e ve sulbiye-i kebîre kızları Fâtıma ve Sâliha’ya münhasıra olmağla müsteşhid-i mezbûrun zevcesi olup karye-i mezbûre sâkinelerinden olan mezbûre Fâtıma Hâtun’a babası müteveffâ-yı mezbûrun muhallefâtından kendiye intikāl ve isâbet eden hisse-i şer‘iyyesi tereke-i müteveffâ-yı mezbûre vâzı‘ü’l-yed olan mezbûrdan İsmail ve Sâliha ve Mücellâ’dan da‘vâ ve talebe ve ahz ü kabza ve kendiye îsâle ve kabz ve îsâle mütevakkıf olduğu umûrun cümlesine zevci müsteşhid-i mezbûr Yusuf’u bizim huzûrumuzda vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve hizmet-i lâzımesini edâya müte‘ahhid oldu biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyete şerâiti’l-kabûl şehâdetleri hayyiz-i kabûlde vâkı‘a olmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam sene 1073 Şuhûdü’l-hâl: Siyavuş b. Abdullah, Mustafa b. Receb, Musa b. Receb, Hüseyin b. Abdullah ve gayruhüm