Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 101 Hüküm no: 79 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Duka Reis v. Preşkova’nın Mustafa Çelebi b. Halil’e ödenmemiş borcu olduğunu kabul etmesi Mahmiye-i Galata hâricinde Cihangir mahallesinde sâkin Mustafa Çelebi b. Halil nâm kimesne meclis-i şer‘-i hatîr-i lâzımü’t-tevkīrde Duka Reis v. Preşkova nâm zimmî muvâcehesinde üzerine da‘vâ ve takrîr-i kelâm edip mezbûr Duka Reis zimmetinde cihet-i karz-ı şer‘îden altı bin nakid akçe ve her kantarı ikişer yüz akçeye olmak üzre yedimden müşterâ makbûz dört kantar on beş vakıyye peksimet bahâsından dahi sekiz yüz altmış akçe cem‘an altı bin sekiz yüz altmış akçe hakkım olup meblağ-ı mezbûrun üç bin yüz akçesini mukaddemâ mezbûr Duka Reis yedinden ahz ü kabz edip bâkī zimmetinde üç bin yedi yüz altmış akçe hakkım kalmağla hâlâ meblağ-ı bâkīyi mezbûrdan taleb ederim suâl olunsun dedikde gıbbe’s-suâl mezbûr Duka Reis cevâbında fi’l-hakīka müdde‘î-i mezbûr Mustafa Çelebi yedinden minvâl-i muharrer üzre altı bin nakid akçe iktirâz ve tesellüm eyledikden sonra meblağ-ı mezbûrun üç bin yüz akçesini kendiye edâ ve teslîm edip bâkī iki bin dokuz yüz akçesi hâlâ zimmetimde deynimdir deyû ikrâr, lâkin mârrü’z-zikr peksimet bahâsından olan meblağ-ı mezbûru inkâr etmeğin müdde‘î-i mezbûrdan ziyâde müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf eyledikde fi’l-vâki‘ vech-i muharrer üzre her kantarı ikişer yüz akçeye olmak üzre mezbûrdan sekiz yüz altmış akçeye dört kantar on beş vakıyye peksimet bahâsından iştirâ etmeyip ve ol cihetden müdde‘î-i mezbûre deyni olmadığına merkūm Duka Reis’e yemîn teklîf olundukda ol dahi yemînden nükûl etmeğin mûcebiyle meblağ-ı mezbûr üç bin yedi yüz altmış akçeyi müdde‘î-i mezbûr Mustafa Çelebi’ye edâ ve teslîme merkūm Duka Reis’e tenbîh birle mâ vaka‘a bi’t-taleb ketb olundu. Hurrire fi’l-yevmi’s-sâmin ve’l-ışrîn min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Mustafa Çelebi b. Receb, Emrullah b. Mehmed, Âbid b. Mustafa, Musa b. Receb, Ahmed Yazıcı b. ( ) ve gayruhüm