Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 102 Hüküm no: 80 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Hasan’ın boşadığı eşi Âişe bt. Mustafa’ya müşterek evlerinin kendisine ait hissesini mehir ve nafakası karşılığı devretmesi Mahmiye-i Galata dâhilinde Yolcuzâde mahallesinde sâkin Mehmed Bey b. Hasan nâm kimesne mahfil-i kazâda zevce-i mutallakası olan râfi‘atü hâze’l-kitâb Âişe bt. Mustafa nâm hâtun tarafından ikrâr-ı câi’z-zikri tasdîka mezbûreyi ma‘rifet-i şer‘iyye ile ârifân olan Musa Efendi b. el-Hâc Ali el-İmâm ve Halil b. Receb nâm kimesneler şehâdetleri ile şer‘an sâbitü’l-vekâle vekîli ve babası olan mezbûr Mustafa muvâcehesinde ikrâr ve takrîr-i kelâm edip zevcem mezbûre Âişe’yi mukaddemâ talâk-ı bâyin [ile] tatlîk eylediğimde zimmetimde mütekarrir ve ma‘kūdun aleyh olan mehr-i müeccelinden sekiz bin akçe ve nafaka-i iddet-i ma‘lûme ve me’ûnet-i süknâsından bin iki yüz akçe ki cem‘an dokuz bin iki yüz akçe mezbûreye vâcibü’l-edâ deynim olmağla mahalle-i mezbûrede vâki‘ iki tarafdan Medîne-i münevvere vakfı ve iki tarafdan tarîk-i âm ile mahdûd bir bâb fevkānî oda ve bi’r-i mâ ve muhavvata ve kenîfi müştemil mülk menzilin nısf-ı şâyi‘i mezbûrenin mülkü ve nısf-ı şâyi‘i benim mülküm olmağın hâlâ menzil-i mezbûrda mülküm olan nısf-ı şâyi‘ini müvekkile-i merkūmeye olan deynim mukābelesinde dokuz bin iki yüz akçeye bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru merkūmeye olan kezâlik dokuz bin iki yüz akçe deyn-i mezkûrum ile takās edip ol dahi mukāssa ve kabûl eyledikden sonra hukūk-ı zevciyyete müte‘allika âmme-i de‘âvîden mezbûrenin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene selâse ve seb‘în ve elf Şuhûdü’l-hâl: Abdullah Efendi b. İsa, Mustafa Çelebi b. Receb, Ahmed Yazıcı b. Mehmed, Muharrem b. Receb, Âbid b. Mustafa ve gayruhüm.