Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 103 Hüküm no: 83 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali Çelebi’nin yelken parasından dolayı el-Hâc Hasan b. Abdullah’a ödeme vakti gelmemiş borcu olduğunu kabul etmesi Yelkenci tâyifesinden el-Hâc Hasan b. Abdullah nâm kimesne mahfil-i kazâda işbu râfi‘ü’l-kitâb es-Seyyid Ali Çelebi b. Ali nâm kimesne mahzarında üzerine da‘vâ ve takrîr-i kelâm edip târih-i kitâbdan üç gün mukaddem mezbûr es-Seyyid Ali Çelebi’ye üç bin akçeye bir kıt‘a yelken bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûrun bin beş yüz akçesini yedinden ahz ü kabz edip meblağ-ı bâkī bin beş yüz akçe zimmetinde kalmışidi el-hâletü hâzihî meblağ-ı merkūmu taleb ederim suâl olunup alıverilmesi matlûbumdur dedikde gıbbe’s-suâl mezbûr es-Seyyid Ali cevâbında fi’l-vâki‘ müdde‘î-i merkūmun vech-i mübeyyen üzre üç bin akçeye iştirâ eylediğim yelken semeninden kabzına i‘tirâf eylediği meblağdan bâkī bin beş yüz akçe zimmetimde hakkı olup lâkin meblağ-ı mezbûru merkūm el-Hâc Hasan târih-i kitâbdan doksan gün tamâmına değin te’cîl ve imhâl eyledi dedikde gıbbe’l-istintâk ve’l-inkâr mezbûr es-Seyyid Ali Çelebi’den müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf eyledikde fi’l-hakīka meblağ-ı mezbûr bin beş yüz akçeye vech-i meşrûh üzre te’cîl etmediğine mezbûr el-Hâc Hasan’a yemîn teklîf olundukda ol dahi nükûl etmeğin mâ hüve’l-vâki‘ bi’t-taleb ketb olundu. Tahrîren fî gurreti şehri Ramazâni’l-mübârek li sene selâse ve seb‘în ve elf Şuhûdü’l-hâl: Mehmed Beşe b. Ebûbekir, Ahmed Yazıcı b. Mehmed, Hüseyin b. Mirza, Hüseyin b. Abdullah, Emrullah b. Mehmed ve gayruhüm.