Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 104 Hüküm no: 85 Orijinal metin no: [12a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Ali’nin kereste parasından dolayı Hasan Çelebi b. Receb’e borcu kaldığını kabul etmesi Mahmiye-i Galata müzâfâtından kasaba-i Tophâne’de Çukurcâmi‘ mahallesinde sâkin işbu râfi‘ü’l-kitâb Hasan Çelebi b. Receb nâm kimesne meclis-i şer‘-i hatîr-i lâzımü’t-tevkīrde Halil b. Ali nâm kimesne mahzarında üzerine da‘vâ ve takrîr-i kelâm edip bundan akdem mahalle-i mezbûrede vâki‘ bir bâb mebnî odamın ancak kerestesini mezbûr Halil’e üç bin sekiz yüz akçeye bey‘ ve teslîm ol dahi vech-i muharrer üzre iştirâ ve tesellüm edip semeni olan meblağ-ı mezbûr zimmetinde kalmışidi hâlâ mezbûrdan suâl olunup meblağ-ı mezkûr[un] alıverilmesi matlûbumdur dedikde gıbbe’s-suâl merkūm Halil cevâbında müdde‘î-i mezbûrdan zikr olunan odasının kerestesini ancak üç bin akçeye iştirâ ve kabûl etmekle meblağ-ı mezbûr üç bin akçe zimmetimde lâzımü’l-edâ deynimdir deyû ikrâr lâkin vech-i muharrer üzre müdde‘îye iştirâsını inkâr edicek müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf eyledikde [12b] fi’l-vâki‘ müdde‘î-i mezbûrdan zikr olunan odasının kerestesini ikrârı olan meblağ-ı mezbûrdan sekiz yüz akçe ziyâdeye iştirâ ve kabûl etmediğine merkūm Halil’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin ikrârı olan meblağ-ı mezkûr üç bin akçeyi müdde‘î-i mezbûre edâ ve teslîme merkūm Halil’e tenbîh birle mâ vaka‘a bi’t-taleb ketb olundu. Hurrire fî gurre şehri Ramazâni’l-mübârek li sene selâse ve seb‘în ve elf Şuhûdü’l-hâl: Âbid b. Mustafa, el-Hâc Cafer b. Yakub, Mustafa Çelebi b. Receb, Ahmed Yazıcı b. Mehmed, Emrullah b. Mehmed