Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 105 Hüküm no: 86 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Affe bt. Mehmed’in eşi Mustafa b. Ahmed’den muhâlaa yoluyla boşanması Mahmiye-i Galata dâhilinde vâki‘ Şehsuvar mahallesinde sâkine Affe? bt. Mehmed nâm hâtun meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâb Mustafa b. Ahmed mahzarında ikrâr ve takrîr-i kelâm edip zevcim mezbûr Mustafa ile beynimizde hüsn-i zindegâne olmamağla zimmetinde mütekarrir ve ma‘kūdun aleyh olan üç bin akçe mehr-i müeccelimden geçip ve nafaka-i ma‘lûmem ve me’ûnet-i süknâm dahi kendi üzerime olup ve mezbûrdan hamlim dahi zuhûr ederse dokuz yaşına değin kendi malımdan infâk ve iksâ etmek üzre zevcim mezbûr Mustafa ile muhâla‘a-i sahîha-i şer‘iyye ile hul‘ oldum dedikde mezbûr Mustafa dahi minvâl-i muharrer üzre hul‘-ı mezkûru kabûl eyledikden sonra hukūk-ı zevciyyete müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tesâduki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min şehri Ramazâni’l-mübârek sene 1073 Şuhûdü’l-hâl: Mustafa b. Receb, Mustafa b. ( ), Âbid b. Mustafa, Siyavuş b. Abdullah.