Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 109 Hüküm no: 92 Orijinal metin no: [13a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa b. Abdullah’ın buğday alımından dolayı Yordan v. Yorgi’ye borcu olduğu Vilâyet-i Rumeli’nde Balçık kazâsına tâbi‘ Kavarna nâm karye sükkânından işbu râfi‘ü’l-kitâb Yordan v. Yorgi nâm zimmî mahfil-i kazâda sâbıkan kayık (...) kapıcı olan Osman Ağa b. Abdullah mahzarında üzerine da‘vâ ve takrîr-i kelâm edip târih-i kitâbdan dokuz ay mukaddem Unkapanı’ndan her keyli yirmi dokuz akçeye olmak üzre iki bin keyl-i İstanbulî buğdayımı cem‘an elli sekiz bin akçeye merkūm Osman Ağa’ya bey‘ ve teslîm ol dahi vech-i muharrer üzre iştirâ ve teslîm ve kabûl eyledikden sonra semeni olan meblağ-ı mezbûrun bundan akdem on iki bin beş yüz akçesini mezbûrun yedinden ahz ü kabz edip bâkī kırk beş bin beş yüz akçesi zimmetinde kalmağla hâlâ meblağ-ı bâkīyi mezbûrdan taleb ederim suâl olunup alıverilmesi murâdımdır dedikde gıbbe’s-suâl merkūm Osman Ağa cevâbında fi’l-vâki‘ târih-i mezbûrda merkūm Yordan’ın yedinden her keyli yirmi dokuz akçeden iki bin keyl-i İstanbulî buğdayını cem‘an elli sekiz bin akçeye iştirâ ve tesellüm ve kabz edip semen-i mezkûrdan bâkī kırk beş bin beş yüz akçe müdde‘î-i mezbûra zimmetimde vâcibü’l-edâ ve lâzımü’l-kazâ deynim vardır deyû ikrâr ve i‘tirâf etmeğin, alâ mûceb-i ikrârihî meblağ-ı bâkī kırk beş bin beş yüz [13b] akçe müdde‘î-i mezbûra zimmetimde vâcibü’l-edâ ve lâzımü’l-kazâ deynim vardır deyû ikrâr ve i‘tirâf etmeğin, alâ mûcebi ikrârihî meblağ-ı bâkī kırk beş bin beş yüz akçeyi müdde‘î-i merkūm Yordan’a edâ ve teslîme mezbûr Osman Ağa’ya tesyîr birle mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene selâse ve seb‘în ve elf Şuhûdü’l-hâl: Gazanfer Bey b. Receb, Ebûbekir Beşe b. Şaban Çukadâr, Ahmed Yazıcı b. Mehmed, Mustafa b. Receb, Âbid b. Mustafa ve gayruhüm.