Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 110 Hüküm no: 93 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hâtun bt. Mustafa’nın borcuna karşılık evini Ahmed Beşe b. Rıdvan’a rehin bırakması Husûs-ı âti’l-beyânın mahallinde tahrîri iltimâs olunmağın savb-ı şer‘den mevlânâ Abdülkerim Efendi b. Mehmed irsâl olunup ol dahi zeyl-i vesîkada muharrerü’l-esâmî olan müslimîn ile mahrûsa-i Galata’ya tâbi‘ kasaba-i İstinye’de Mahmud Çavuş mahallesinde sâkine Sâliha Hâtun bt. Mustafa Ağa’nın menziline varılıp akd-i meclis-i şer‘-i şerîf eyledikde mezbûre Sâliha Hâtun meclis-i ma‘kūd-ı merkūmda hâfızü hâze’l-kitâb Ahmed Beşe b. Rıdvan nâm kimesne mahzarında ikrâr-ı tâm ve ta‘bîr ani’l-merâm edip mezbûr Ahmed Beşe yedinden kırk bin akçe istikrâz ve zabt edip ol dahi ikrâz ve teslîm etmekle meblağ-ı mezbûr mukābelesinde silk-i mülkümde münselik olup mahalle-i merkūmede vâki‘ bir tarafdan fahrü’l-eşbâh Ahmed Ağa b. Mehmed nâm kimesne mülkü ve bir tarafdan Laklakī Osman Beşe b. Hamza nâm kimesne mülkü ve bir tarafdan tarîk-i âm ve bir tarafdan sâhil-i bahr ile mahdûd iki bâb tahtânî odaları ve bir sofa ve bir çeşmeyi ve zât-ı eşcâr-ı müsmire ve gayr-ı müsmire bahçeyi müştemil menzilimi mezbûr Ahmed Beşe’nin yedine rehin vaz‘ ve teslîm edip ol dahi vech-i muharrer üzre irtihân ve tesellüm ve kabz eyledi dedikde vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan el-Hâc Cafer b. Yakub nâm kimesne ile meclis-i şer‘a gelip vukū‘u üzre inbâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene selâse ve seb‘în ve elf Şuhûdü’l-hâl: Hasan Efendi b. Hüseyin, fahrü’l-kuzât ve’l-islâm Mehmed Efendi b. Hasan, Murad Efendi b. Şaban el-İmâm, Mehmed Çelebi b. Hüseyin, İbrahim Çelebi b. Mustafa, Yusuf Çelebi b. Abdullah, Hasan Çelebi b. Abdullah, Hüseyin Çelebi b. Abdullah, Hüseyin Çelebi b. Abdullah, Hüseyin Çelebi b. Abdullah, Mustafa Çelebi b. Ali, Ahmed b. Rıdvan, el-Hâc Ahmed b. Hüseyin, Mustafa Beşe b. Murad, Zülfikār b. Abdullah, Abdülkerim b. Abdullah, İbrahim b. Hasan, Rıdvan b. Abdullah, Ali b. Veli, İbrahim Beşe b. kayıkçı, Ahmed b. Ramazan, el-Hâc Cafer.