Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 114 Hüküm no: 99 Orijinal metin no: [14b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Nikola’nın fıtık ameliyatını yapacak İstati v. Yani’yi mesul tutmadığı Mahmiye-i Galata dâhilinde Karaköykapısı kurbunda Sultan Bayezid mahallesinde sâkin Yorgi v. Nikola nâm zimmî meclis-i şer‘-i hatîr-i lâzımü’t-tevkīrde râfi‘u hâze’l-kitâb İstati v. Yani nâm zimmî mahzarında ikrâr ve takrîr-i kelâm edip ben maraz-ı fıtıka mübtelâ olup merkūm İstati maraz-ı mezkûra ilâcda ehil olmağın mezbûr İstati maraz-ı merkūma ilâc ve timar etmek için müddet-i ma‘lûme tamâmına değin on esedî guruş ücret ile nefsini bana îcâr ben dahi vech-i muharrer üzre istîcâr ve mu‘tâd üzre kasığımı şak ve münfetik olan mevzi‘i kat‘ için mezbûre emr edip eğer ben mezbûrun vech-i muharrer üzre şakk ve kat‘ının sirâyeti sebebi ile helâk olursam dem ve diyetime müte‘allik olan da‘vâdan mezbûrun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene selâse ve seb‘în ve elf Şuhûdü’l-hâl: Musa b. Receb, Mustafa b. Receb, Siyavuş b. Abdullah, Hüseyin b. Abdullah, Emrullah b. Mustafa, Hüseyin b. Abdullah.