Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 114 Hüküm no: 100 Orijinal metin no: [14b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölmüş olan Yani ve Franci’nin beytülmâl emini tarafından zabtedilen eşyasının mirasçılarına verilmesi Fi’l-asl cezîre-i İstanköy sükkânından olup hâlâ mahrûsa-i Galata’da Sultan Bayezid mahallesinde müsâferet üzre sâkin iken bundan akdem müte‘âkiben hâlik olan Yani ve Franci veledey Agusti nâm zimmînin verâseti zevce-i metrûkesi Dökine ile li ebeveyn kız karındaşları Mariyata nâm sagīreye ve Yasuti nâm nasrâniye münhasıra olduğu şer‘an zâhir ve müte‘ayyin oldukdan sonra sagīre-i mezbûrenin tesviye-i umûruna kıbel-i şerî‘at-ı mergūbeden mansûbe vasîsi ve mezkûretân Dökine ve Yasuti’nin husûs-ı âti’z-zikre vekîl olup Mustafa Çavuş b. Abdülmennân ve Hasan b. Abdullah nâm kimesneler şehâdetleri ile şer‘an vekâleti sâbite olan mezbûre Yasuti’nin zevci Mihal v. Yorgi nâm zimmî meclis-i şer‘-i şerîfde hâlâ mahrûsa-i mezbûrede emîn-i beytülmâl olan fahrü’l-eşbâh Siyavuş Ağa tarafından husûs-ı câ’îye vekîl-i müsecceli olan Osman Bey mahzarında vekâleten ve vesâyeten ikrâr ve takrîr kelâm edip hâlikân-ı mezbûrânın defter-i kassâm nâtık olduğu üzre on beş zirâ‘ bir kayık ve âlât-ı lâzımesini emîn-i müşârün-ileyh hâlikân-ı mezbûrânın zâhirde vârisi olmamak zu‘muyla kabz etmişidi el-hâletü hâzihî vekâlet ve vesâyet-i mahkiyem hasebiyle mârrü’z-zikr kayık ve âlât-ı lâzıme-i mezkûreyi vekîl-i merkūm yedinden bi’t-tamâm ahz ü kabz edip emîn-i müşârün-ileyh yedinden hâlikân-ı merkūmânın terekesinden vechen mine’l-vücûh hak ve alâka kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’[l-yevmi]’s-sânî min şehri Ramazâni’l-mübârek li sene selâse ve seb‘în ve elf Şuhûdü’l-hâl: Abdülkerim Çelebi el-Kâtib, Mehmed Çelebi b. Hüseyin Efendi el-Kâtib, Şaban Hoca İstanköylü, Hüseyin b. el-Muhzır, Mustafa b. Receb.