Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 115 Hüküm no: 101 Orijinal metin no: [14b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimitri ve Yani v. İspilyot’un ölen ortakları Yani Kuru balık v. Yorgi’de kalan metalarını mirasçılarından teslim aldıkları Mahmiye-i Galata hısnı ebvâbından Yağkapanıkapısı hâricinde sâkin bakkal tâifesinden Yani v. Dimitri ve diğer Yani v. İspilyot nâm zimmîler meclis-i şer‘-i hatîr lâzımü’t-tevkīrde meyhâneci tâyifesinden işbu râfi‘ü’l-kitâb Nikola v. Nikite nâm zimmî muvâcehesinde her biri ikrâr ve takrîr-i kelâm edip bundan akdem zikr olunan kapı hâricinde bakkal iken hâlik olan Yani Kuru Balık v. Yorgi nâm zimmî bakkal metâ‘ından şerîkimiz olmağla mâl-ı şirketden yedinde otuz yedi bin akçe hakkımız olup ba‘de helâkihî dükkânında mevcûd olan bakkal metâ‘ı müstakillen hâlik-i mezbûrun mülkü olmak zannıyla tahrîr olunup ber mûceb-i defter-i kassâm muhallefâtını vârisi olmak üzre merkūm Nikola kabz eyledikde biz dahi asl-ı mâlımız olan meblağ-ı mezbûru târih-i kitâbdan ay mukaddem hâlik-i mezbûrun terekesine vâzı‘ü’l-yed olduğu cihetden mezbûr Nikola’dan da‘vâ ve taleb eylediğimizde ol dahi inkâr etmekle müdde‘âmızı mezbûr Nikola’nın muvâcehesinde şuhûd-ı udûl ile isbât eylediğimizden sonra meblağ-ı mezbûr otuz yedi bin akçeyi yine târih-i mezkûrda tereke-i hâlik-i merkūmdan olmak üzre merkūm Nikola’nın yedinden bi’t-tamâm ve’l-kemâl ahz ü kabz etmişdik min ba‘d meblağ-ı mezbûrdan bir akçe ve bir habbe hakkımız bâkī kalmadı dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mehmed Efendi b. Mustafa el-İmâm, es-Seyyid Mehmed Efendi b. es-Seyyid Ali, Ali Çelebi b. Mahmud, Musa b. Receb, Zülfikār b. İbrahim, Ebûbekir Beşe b. Şaban Çukadâr, Hüseyin b. Mirza, Mustafa b. Receb, Emrullah b. Mehmed.