Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 117 Hüküm no: 103 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hasan’ın eşi Mehmed b. Mustafa’dan boşandığı Mahmiye-i Galata müzâfâtından kasaba-i Kasımpaşa’da Bedreddin Bey mahallesinde sâkine Âişe bt. Hasan nâm hâtun meclis-i şer‘-i hatîr-i lâzımü’t-tevkīrde zevci işbu bâ‘isü’l-kitâb Mehmed b. Mustafa nâm kimesne mahzarında bi tav‘ihâ ikrâr ve takrîr-i kelâm edip zevcim mezbûr Mehmed beni talâk-ı bâyin ile tatlîk etmeğin zimmetinde mütekarrir ve ma‘kūdun aleyh olan iki bin akçe mehr-i müeccelim ve nafaka-i iddet ve me’ûnet-i süknâm için ta‘yîn olunan dört yüz akçe ki cem‘an iki bin dört yüz akçeyi zevcim mezbûr Mehmed yedinden bi’t-tamâm ve’l-kemâl ahz ü kabz edip zevciyyete ve gayra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min şehri Ramazâni’l-mübârek li sene selâse ve seb‘în ve elf Şuhûdü’l-hâl: Ramazan b. Yusuf, Hasan b. Süleyman, Hüseyin b. Haydar, Abdullah b. Mustafa, Mustafa b. Halil, İbrahim b. Mustafa.