Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 117 Hüküm no: 104 Orijinal metin no: [15a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedi Ahmed’in babası Andriye’den kalıp annesi Fotina bt. Kosta’ya sattığı hissesi ile ilgili alacağı hususunda sulh yapması Mahmiye-i Galata dâhilinde Sultan Bayezid mahallesinde sâkin iken bundan akdem hâlik olan Andriye nâm zimmînin sulbî kebîr oğlu olup ba‘de helâkihî şeref-i İslâm ile müşerref olan Ahmed nâm mühtedî mahfil-i kazâda vâlidesi işbu râfi‘atü’l-vesîka Fotina bt. Kosta nâm nasrâniye muvâcehesinde üzerine da‘vâ ve takrîr-i kelâm edip babam hâlik-i mezbûrun muhallefâtından olup mahalle-i merkūmede vâki‘ bir tarafdan Dimitri v. ( ) mülkü ve bir tarafdan Hırsola v. Yani mülkü ve bir tarafdan Veltiye v. ( ) mülkü ve bir tarafdan tarîk-i âm ile mahdûd mülk menzil ile mahrûsa-i İstanbul’da Balatkapısı hâricinde vâki‘ lede’l-ahâlî ma‘lûmü’l-hudûd büyût-ı cedîdeyi müştemil mülk odalarının her birinde hisse-i irsiyyem olan on dört sehm-i şâyi‘imi safka-i vâhide ile vâlidem mezbûreye on beşer bin akçeye bâtten bey‘ ve teslîm ve yine hâlik-i mezbûrun icâre-i mu‘accele ve müeccele ile taht-ı tasarrufunda olup ba‘de helâkihî intikāl-i âdî ile rub‘u bana ve selâse-i erbâ‘ı kız karındaşlarım Garafolya ve Kasandra ve Peruza’ya intikāl eden Azebkapısı dâhilinde vâki‘ bir bâb vakıf boyacı dükkânında mutasarrıf olduğum rub‘-ı şâyi‘inin hakk-ı tasarrufunu izn-i mütevellî ile beş bin akçe bedel mukābelesinde yine mezbûreye ferâğ ve tefvîz ol dahi vech-i muharrer üzre iştirâ ve tesellüm ve tefevvuz ve kabûl eyledikden sonra semeni olan meblağ-ı mezbûr ile bedel-i mersûm ki cem‘an yirmi bin akçenin mukaddemâ on yedi bin akçesini mezbûrenin yedinden ahz ü kabz edip dokuz bin akçesi zimmetinde kalmağın bundan esbak meblağ-ı bâkīyi mezbûre Fotina’dan taleb ve da‘vâ etmekle beynimizde münâza‘ât-ı kesîre ve muhâsamât-ı şedîde vâki‘ olmuşidi el-hâletü hâzihî beynimizde muslihûn tavassut edip dokuz bin akçeden beni iki bin akçe bedel üzerine inşâ-i akd-i sulh eylediklerinde ben dahi sulh-i mezbûru kabûl ve bedeli olan meblağ-ı mezbûru yedinden ahz ü kabz edip mâ‘adâsı olan yedi bin akçeden ve hâlik-i mezbûrun menkūlât ve akār kısmından olan mecmû‘ muhallefâtına müte‘allika âmme-i de‘âvâdan mezbûrenin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâdis min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Emrullah b. Mehmed, Âbid b. Mustafa ve gayruhüm.