Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 118 Hüküm no: 105 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Kapudân b. Abdullah’ın evini eşi Sâliha bt. Abdullah’a satması Mahmiye-i Galata dâhilinde Câmi‘-i Kebîr mahallesinde sâkin Hüseyin Kapudân b. Abdullah nâm kimesne meclis-i şer‘-i hatîr-i lâzımü’t-tevkīrde zevcesi işbu râfi‘atü’l-kitâb Sâliha bt. Abdullah nâm hâtun tarafından ikrâr-ı âti’l-beyânı tasdîka vekîl olup mahzar-ı hasm-ı şer‘î-i câhidde el-Hâc Hüseyin b. Abdullah ve Hızır b. Hasan nâm kimesne şehâdetleri ile şer‘an vekâleti sâbite olan Mehmed b. Ramazan nâm kimesne mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan el-Hâc Ali veresesi mülkleri ve bir tarafdan câmi‘-i mezbûr imâmına meşrûta vakıf menzil ve iki tarafdan tarîk-i âm ile mahdûd iki bâb fevkānî odayı ve bir mahzeni ve bir kenîfi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık zevcem müvekkile-i mezbûre Sâliha Hâtun’a otuz bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr otuz bin akçeyi yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr zevcem müvekkile-i mezbûre Sâliha Hâtun’un mülk-i müşterâsıdır. Keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene selâse ve seb‘în ve elf. Şuhûdü’l-hâl: Cafer Kapudân b. Abdullah, Mustafa Çelebi [b.] el-Hâc Ali el-Kayyım, Mehmed b. Ali, Seyyid Ali Çelebi b. İbrahim, el-Hâc Cafer b. Yakub, Mustafa b. Receb ve gayruhüm.