Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 119 Hüküm no: 107 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani Kuru balık v. Yorgi’nin mirasını elinde bulunduran Nikola’nın Yani’nin ortaklarına ait meblağı ödediğinin tespiti Mahmiye-i Galata’da meyhâneci tâifesinden Nikola v. Nikite nâm zimmî meclis-i şer‘-i hatîr-i lâzımü’t-tevkīrde mahmiye-i mezbûre hısnı ebvâbından Yağkapanıkapısı hâricinde sâkin bakkal tâifesinden işbu râfi‘ü’s-sifr Yani ve Dimitri ve diğer Yani v. İspilyot nâm zimmî muvâcehelerinde ikrâr ve takrîr-i kelâm edip bundan akdem zikr olunan kapı hâricinde bakkal iken hâlik olan Yani Kuru balık v. Yorgi nâm zimmînin muhallefâtı tahrîr olundukda dükkânında mevcûd olan bakkal metâ‘ının cümlesi hâlik-i mezbûrun müstakillen mülkü olmak zannıyla tahrîr olunup ber mûceb-i defter-i kassâm muhallefât-ı hâlik-i mezbûru[n] vârisi olmak üzre ben kabz eylediğimde mezbûrân Yani ve diğer Yani dahi metâ‘-ı mezkûrda hâlik-i merkūm ile şerîkler olup mâl-ı şirketden hâlik-i mezbûr yedinde otuz yedi bin akçe hakkım vardır deyû muhallefât-ı mezkûreye vâzı‘ü’l-yed olduğum hasebiyle târih-i kitâbdan sekiz ay mukaddem benden da‘vâ ve taleb edip ben dahi inkâr etmekle müdde‘âlarını şuhûd-ı udûl ile muvâcehemde isbât eylediklerinden sonra ber mûceb-i defter-i kassâm makbûzum olan muhallefât-ı hâlik-i mezbûrdan meblağ-ı merkūm otuz yedi bin akçeyi yine târih-i mezkûrda merkūmâna edâ ve teslîm eylemişidim. El-hâletü hâzihî verdiğim meblağ-ı mezbûra müte‘allika mezbûrân Yani ve diğer Yani ile vechen mine’l-vücûh da‘vâ ve nizâ‘ım yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Ramazâni’l-mübârek sene 1073 Şuhûdü’l-hâl: Mehmed Efendi b. Mustafa el-İmâm, es-Seyyid Mehmed Efendi b. es-Seyyid Ali, Ali Çelebi b. Mahmud, Musa b. Receb, Zülfikār b. İbrahim, Ebûbekir b. Çukadâr, Hüseyin b. Mirza, Mustafa b. Receb, Emrullah b. Mehmed.