Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 120 Hüküm no: 108 Orijinal metin no: [15b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zabeta’nın evini basıp Asteri bt. Pertola’nın çocuğunu düşürmesi sonucunda tazminat ödendiği Mahrûsa-i Galata’da Bereketzâde mahallesinde sâkine Zabeta bt. Yorgi nâm nasrâniye tarafından husûs-ı âti’l-beyânı ikrâra vekîl olup merkūmeyi ma‘rifet-i şer‘iyye ile ârifân Osman Çavuş b. Receb ve el-Hâc Mehmed b. Abdullah nâm kimesneler şehâdetleri ile şer‘an vekâleti sâbite olan Yani v. İstavriti nâm zimmî meclis-i şer‘-i hatîr-i lâzımü’t-tevkīrde râfi‘atü hâze’l-vesîka Asteri bt. Pertola nâm nasrâniye muvâcehesinde bi’l-vekâle ikrâr ve takrîr-i kelâm edip târih-i kitâbdan üç gün mukaddem mezbûr[e] Sefer b. Hüseyin nâm kimesne ile müvekkile-i merkūmenin fuzûlen menzili dâhiline girmeleri ile ol havfdan nâşî sâkıt vâki‘ oldu deyû mûcebince mukaddemâ mezbûr Asteri’den da‘vâ ve taleb eylediğinde beynimizde münâza‘ât-ı kesîre vâkı‘a olmuşidi el-hâletü hâzihî vesâtat-ı muslihîn ile da‘vâ-yı mezkûresinde mezbûre Asteri bin akçe üzerine inşâ-i akd-i sulh eyledikde ol dahi sulh-i merkūmu kabûl ve bedel-i sulh olan meblağ-ı mezbûru müvekkile-i mezbûrenin zimmetinde mezbûr Asteri’ye deyni olan iki bin akçenin bin akçesine takās ol dahi mukāssa ve kabûl eyledikden sonra ba‘de’l-yevm husûs-ı mezbûra müte‘allika âmme-i da‘vâdan mezbûre Asteri’nin zimmetini ibrâ ve iskāt eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu Hurrire fi’l-yevmi’t-tâsi‘ min şehri Ramazâni’l-mübârek li sene selâse ve seb‘în ve elf Şuhûdü’l-hâl: Nasuh Efendi b. Yusuf, el-Hâc Süleyman b. Ali, Hüseyin b. Abdullah, Mehmed Çelebi b. Hüseyin, Mustafa Çelebi b. Receb.