Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 121 Hüküm no: 109 Orijinal metin no: [15b-5, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kocasından haber alınamayan Neslihan bt. Mahmud adlı kadına ve Sâliha adlı kızına nafaka takdir edildiği Mahmiye-i Galata mahallâtından Câmi‘-i Kebîr mahallesinde sâkine olan Neslihan bt. Mahmud nâm hâtun meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzıra olup Ahmed b. ( ) nâm gāib zevcinin kendisine nafaka cinsinden bir şey ve kisve bırakmadığına ve göndermediğine Allâhü te‘âlâ adına yemîn ettiğinde hâkim-i muvakki‘ a‘lâ hâze’l-kitâb, mezbûrenin nafakası, kisvesi ve sâir havâic-i lâzımesi için zeyilde mezkûr târihden i‘tibâren gāib-i mezbûr zevci üzerine râyicü’l-vakt altı akçe farz ve takdîr etti zevc-i mezbûr Ahmed’den olma Sâliha nâm sagīre kızının nafakası için de gāib-i mezbûr zevci üzerine râyicü’l-vakt dört akçe farz ve takdîr etti. Hâkim-i mûmâ-ileyh sonra meblağayn-ı mefrûzayn-ı mezbûreyni kendisinin ve sagīre kızının havâicine sarfına ve vakt-i hâcetde istidâne edip lede’z-zafer zevc-i gāibine rücû‘una merkūme Neslihan’a izin verdi. Cerâ zâlike ve hurrire fi’l-yevmi’s-sânî aşer min şehri Ramazâni’l-mübârek sene selâse ve seb‘în ve elf. Şuhûdü’l-hâl: Nasuh Efendi b. Yusuf, Abdülkerim Efendi el-Kâtib, Hüseyin b. Abdullah, Hasan b. Bayezid, Âbid b. Mustafa, Emrullah b. Mehmed