Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 121 Hüküm no: 110 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dışardan deri getiren tüccarın derileri koltukçulara satmalarının önüne geçilip debbağ esnafına satmalarının temini Galata müzâfâtından kasaba-i Kasımpaşa’da vâki‘ debbâğ tâifesinden Ahi Baba olan el-Hâc Halil b. İbrahim ve kethüdâ el-Hâc Mehmed b. İbrahim ve yiğitbaşı olan el-Hâc Hüseyin b. İshak ve el-Hâc Mehmed b. Mehmed ve Mehmed Çelebi [b.] Halil ve el-Hâc Mustafa b. Muharrem ve sâirleri mahfil-i kazâda tüccâr tâifesinden Sefer b. Sefer ve es-Seyyid Osman b. ( ) ve Ömer b. Mehmed ve Bursalı Yusuf b. Abdullah nâm kimesne mahzarlarında üzerlerine da‘vâ ve takrîr-i kelâm edip kadîmden bu âna gelinceye değin mahmiye-i İstanbul ve Galata ve tevâbi‘lerine taşradan tâcirler getirdikleri ham su sığırı ve kara sığır ve inek derilerini mahsûs metâ‘ımız olmağla semen-i misli ve değer bahâsıyla bize bey‘ edegelmişler iken hâlâ mezbûrân Sefer ve es-Seyyid Osman ve Ömer ve Yusuf hâricden getirdikleri su sığırı ve kara sığır inek derilerini mîrîye biz ziyâde kösele verip köseleye müzâyaka üzre iken bize bey‘ etmeyip olugelmişe muhâlif koltukçulara bey‘ etmelerinden bize küllî gadr eylediklerini düstûr-ı mükerrem müşîr-i müfahham nâzım-ı menâzımı ümem, muslih-i mesâlih-i benî Âdem bi’l-fi‘l kāimmakām-ı vezâret-i uzmâ ve mesned nişîn-i vekâlet-i kübrâ olan sa‘âdetli İsmail Paşa -yesserallâhu ümniye hasbemâ yeşâ’ hazretlerine arzuhâl eylediğimizde fazîletli Galata efendisi hazretleri tâife-i merkūmenin ahvâlini göre deyû yedimize buyruldu-yı şerîf verilmeğin nazar olunup mûcebince ba‘de’l-yevm tâcirûn-ı merkūmûn getirdikleri sâlifü’z-zikr derilerini koltukçulara ve âhara bey‘ etmeyip ancak bize bey‘ etmeleri için mezbûrâna tenbîh olunmak matlûbumuzdur suâl olunsun dediklerinde gıbbe’s-suâl mezbûrûn tâcirler cevâblarında fi’l-vâki‘ hâl minvâl-i muharrer üzre olduğunu her biri ikrâr ve i‘tirâf etmekle alâ mûcebi ikrârihim hâricden getirdikleri mârrü’z-zikr derilerini semen-i misli ve değer bahâsıyla tâife-i merkūmeye bey‘ etmeğe merkūmûn tâcirlere tenbîh birle mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Ebûbekir Beşe b. Osman Çukadâr, Musa b. Receb, Ahmed Yazıcı b. Mehmed, Mehmed.