Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 701 Hüküm no: 905 Orijinal metin no: [108a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Orducu teklifi için yamaklara verilen ücretin 5500 akçe olduğu Mahmiye-i İstanbul’da vâki‘ tabbâhların kethüdâları olan el-Hâc Abdi b. Osman ve ihtiyârlarından Hacı Mustafa b. Hasan ve Hacı Bilâl b. Yakub nâm kimesnelerden meclis-i şer‘-i hatîrde turşucu tâifesinin kethüdâları Musli b. Hacı Veli ve ihtiyârlarından Mehmed b. Ali ve Şaban b. Mustafa ve Halil b. Mehmed nâm kimesneler mahzarında her biri üzerlerine da‘vâ ve takrîr-i kelâm edip mezbûrlar ordu tekâlîfinde biz yamak olmağla beher sene vâki‘ olan ordu tekâlîfi için bize beş bin beş yüz akçe veregelmeleri ile hâlâ bu sene-i mübârekede beş [bin] akçesini verip beş yüz akçesini vermede ta‘allül ederler suâl olunup meblağ-ı mezbûr beş yüz akçenin dahi mezbûrlardan alıverilmesi matlûbum[uz]dur dediklerinde gıbbe’s-suâl mezkûrûn Musli ve Mehmed ve Şaban ve Halil cevâblarında beher sene vâki‘ olan ordu teklîfi için beş bin akçe veregelmişizdir deyip beş bin beş yüz akçe verdiklerini inkâr eylediklerinde, müdde‘iyyûn-ı merkūmûndan müdde‘âlarını mübeyyine beyyine taleb olundukda ityân-ı beyyineden her biri izhâr-ı acz ile istihlâf ettiklerinde fi’l-vâki‘ beher sene vâki‘ olan ordu teklîfi için merkūmûna beş bin beş yüz akçe veregelmediklerinde merkūmûn Musli ve Mehmed ve Şaban ve Halil’den her birine yemîn teklîf olundukda ol dahi alâ vefki’l-mes’ûl yemîni billâhi te‘âlâ etmeğin mûcebince bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Ahmed, Mustafa Çelebi b. Mehmed, Mehmed b. Ramazan.