Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 701 Hüküm no: 906 Orijinal metin no: [108a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mehmed b. Kenan’ın, câriyesi Mülâyim’i âzat ettiği Mahmiye-i İstanbul’da bâzirgânbaşı mahallesinde sâkin hâlâ nalbantlar kethüdâsı olan el-Hâc Mehmed b. Kenan meclis-i şer‘-i hatîr-i lâzımü’t-tevkīrde ikrâr ve takrîr-i kelâm edip ıtkı rakabât a‘zam-ı kurebât olup mu‘takın her uzvu nârdan âzâd olduğunu nâtık hadîs-i şerîfin mefhûm-ı latîfine muttali‘ olduğuma binâen silk-i mülkümde münselik rıkk-ı sâbıkını bana mu‘terife orta boylu, [açık] kaşlı, elâ gözlü Rûsiyyetü’l-asl Mülâyim bt. Abdullah nâm câriyemi hasbeten lillâhi te‘âlâ ve hasbeten li rûhi Resûlihi’l-mu‘allâ tahrîr ve i‘tâk ve harâir-i asliyyât silkine idrâc ve ilhâk eyledim ba‘de’l-yevm mezbûre Mülâyim sâir harâir-i asliyyât gibi hürre olup üzerinde velâdan gayrı hakkım kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mustafa Efendi b. ( ) el-Müezzin, Ata Mahmud Çelebi, el-Hâc Receb b. Mehmed, el-Hâc Ahmed b. Mehmed.